U President ka National People’s Party (NPP) Meghalaya uwa man leh u MP ha Rajya Sabha, u Dr. Wanwei Roy Kharlukhi da soohrkhai u hajrong i klam ki heh ka BJP wa ym ye u seiñ ya ka sorkar Meghalaya khlem ka BJP. Da ong u wa na ka riti synchaar kawa kammon wa ka BJP kam ko wa ymye wow chna sorkar ha Meghalaya khlem ka BJP.
Ka Bharatiya Janata Party (BJP) lyngba ki heh yong ka kiwa kynthup nadooh u MP ka BJP na Arunachal Pradesh uwa man leh u Montri ha ka sorkar India, u Kiren Rijiju wa ki heh ka BJP na Meghalaya da kam ki wa ymye wow chna sorkar ha Meghalaya hadien ka Election 2023 khlem ka BJP.
Hawa kylli hajrong ini, u Dr. Kharlukhi da ong u wa katkam ka riti synchaar ka ri India, u Lat ka jylla hap khut u ya ki seiñ wa em boon paaid wow chna ya ka sorkar hadien ka Election. Da ong u wa ym tip de u da kayi ka riti synchaar wa pynman ya ka BJP wow kam wa du ka wa ye u chna sorkar.
Ha iwi i liang uni u heh ka NPP da ong u wa ka Party ym yakdoh lok ko wa kawon kawon ka Party chwa ka Election, tangwa hadien ka Election lada ym em kiwa yoh boon paaid daw pait kammon wow leh, deiwa pynrap wa katni ka NPP booh thong ko wow jop rap boon khlem kiwi kiwa synraan wow chna sorkar.
Hawa kylli, u Dr. Kharlukhi ong u wa em 6-7 ngut ki MLA na kiwi ki Party ki wow psiah cha ka NPP wei heiyatoh wa ka AITC da ong u wa kani ka seiñ dang emkaam ko wow yoh ya i rai ki paidbah.
