U MDC ka liang pyrchah ha KHADC, u Bajop Pynrope da ong u wa ym em yumut wow booh ya ki nan dakha yong ka Council neibhah da man kamwa pynlut ke yaka poisa ka Council hadooh T.18 lak chi snem neibynta wow su ya kiwa pait wa psan ya kitai ki dakha katwa ki dakha won toh kiwa rakhoh ki wym yoh wow pynmih poisa.
Hachwa ini, u Executive Member ka KHADC wa pait ya ka chnat Fisheries, u Mitchel Wankhar hawa jubab yeiwa kylli ha yung dorbar da pyntip u wa ka KHADC da pynlut ko hadooh T.18 lak chi snem neibynta wow su ya ki 4 ngut kiwa pait ya ka nan dakha yong ka Council ha Lailad kawa em ha Ri Bhoi District, heiwa da pyntip u leh wa ha u snem 2018 da theh hadooh 80 kilo ki symbe dakha, tangwa kitai ki dakha ym heh ki wei rakhoh ki neidaw wym biang i rukom sumaar.
Neiliang u EM da pyntip u wa i yoh lum yong ka KHADC man ko iwa duna bha na kitai ki nan, heiwa da pyntip u wa ha u snem 2007-2008 da yoh du T. 2000 katwa ha u snem 2018-19 da yoh lum du T. 7500 deiwa dai ya ki dakha.
Hawa jubab chooh chooh ya iwa kylli, u Wankhar da pyntip u wa ka Council da pynlut ko hadooh T.25 lak wow chna ya ki nan dakha yong ka Council, wei da pyntip leh wa ha i yachem wa u Montri ka sorkar pyrdi ha Delhi, ka chnat da paan yarap ko T.84 klur neibynta wow pynku ya i kaam pynmih dakha yong ka Council.
