Ka Meghalaya da rem ko da 6 Wicket haka Manipur haka yalehke wa nyngkong yong ka haka Syed Mushtaq Ali Trophy T20 Tournament wa pynman ha Chennai ynne ka sngi.
Kiwa yalehke ka Meghalaya (Senior Men’s Team) da poi ki ha ka nongbah ka Tamil Nadu hadien was dang u snem thymme yow pyndep ki yaka Quarantine wei wow pynkreh yei sdang ka samoi yalehke kawa da pynslem neidaw ka khlam COVID-19.
Ka yalehke da pynman du 13 Over chilliang neidaw wa jhieh ka madan kamtæ ym ye wow sdang heipor wa da booh. Ka Manipur da jop ko yaka kylla khlem wei da jied ko wow phah Bat nyngkong yaka Meghalaya kawa da haap lut ki Wicket deiwa kamai 62 Run na ki 13 Over.
Lada ym em i kamai u Ravi Teja (Guest-Professional) uwa yoh 35 Run na ki 31 tylli ki bol, i kamai Run ka Meghalaya da man i iwa duna bha. Na waroh kiwa Bat wa kynthup ya ki arnut ki Guest-Professional wa kynthup ya u Punit Bisht wa u Sanjay Yadav ym ye ki wow kamai 10 Run leh.
Kiwa kawang bol ka Meghalaya da sdang bha ki heiwa u Akash Kumar Choudhary da yoh Wicket u pyn naka bol wa nyngkong. U Dippu Sangma haka Over wa bood da pynhaap sa ya uwi uwa wai yei kamai Run ka Manipur. Hadien ar tylli ki Run Out kiwa wan uwi hadien uwi, ka Manipur da kop kop ko deiwa yoh 15/4 tangwa ka kamai lang wa 50 Run hapyrdi u Narsingh Yadav (33 not out) wa u Nitesh Sedai (24 not out) da pynjop ko ya ka Manipur kawa da yoh 66/4 naka 12.1 Over.
Ka Meghalaya daw yachem won ko waka Mizoram haka 13 tarik.
