U Dr. Mukul Sangma uwa man leh uwa yahkhmat ka liang pyrchah ha ka jylla da kyntait u ya i dawa wow lai waroh ki MLA cha Delhi deiwa ong wa kam uwa mihkhmat ym em chong paitke hi-eh, tangwa da dep leh ya i kamram hapoh ka yung dorbar wei ym em wa ye u batai iyi wa toh u leh. Da ong u wa i kamram yong ka sorkar jylla wow pynyoh ya ka Inner Line Permit (ILP) na ka sorkar pyrdi, deiwa chim yei kitkhlieh ya iyi wa da rai wa da chim hapoh ka yung dorbar chna aiñ.
Hawa kylli hajrong i dawa wa waroh 60 ngut ki MLA toh u lai ki cha Delhi neibynta wow dawa ya ka ILP na ka sorkar pyrdi, da ong u wa ki MLA ka liang pyrchah da yaklam ki ya kani ka phang wow pynkynmoo ya ka sorkar hajrong ki rai wa ki kular wei iwa chim hapoh ka yung dorbar toh wow pynmankaam.
Hajrong i ong u Montri ka sorkar pyrdi wa pait yaki kaam yalehke u Kiren Rijiju, wa ka ILP toh i rai yong kiwa synchaar wa em haneiñ, u Dr. Mukul da ong u wa toh i klam yow lait chah pynbaad ya idæ, tangwa toh u kylli leh na u Montri hajrong ka rai wa da chim da ka yung dorbar chna aiñ, heiwa 2 ngut ki MLA ka BJP wa em ha ka sorkar leh da embynta lang.