Synraan ki hajar ngut deilang i choh bom yei lai thap pyrtuid yaleh MP ka Dr. Ampareen

Ka Dr. Ampareen Lyngdoh ynne ka sngi da pyndep ko yei thap pyrtuid kam ka kyrtong ka NPP cha ka Lok Sabha na Shillong Parliamentary Constituency kawa daw pynman yei thap Vote haka 19 tarik u bnai wow wan.

Ya ka Dr. Ampareen da wan wow synraan lang da ki Symbood Montri Rangbah, u Prestone Tynsong wa u Sniawbhalang Dhar deilang wa kiwi de kiwa yahkhmat ka NPP heiwa da mih ki wow lai kjat na yung ka Dr. Ampareen na Laitumkhrah deiwa emlang ki hajar ngut kiwa kyrchaan.

Nyngkong da lai chwa ko cha u mot u pa ko u (L) Peter G. Marbaniang uwa jooh man kam u MP ka Lok Sabha nadooh u snem 1989 hadooh u snem 1996 yow yoh yei kyrkhu yong oo dep te lai ki cha yung krehkaam u DC ka East Khasi Hills, Shillong deilang i choh bom.

Hawa klam hadien wa da dep thap pyrtuid, ka Dr. Ampareen da ong ko wa ym kwah ko wow pynbaad næ wow klam sih ya kiwi ki kyrtong næ ki seiñ saaiñ pyrthai, tangwa ka chap yong ka toh ka Kot na ka NPP.

Da ong ko wa ka Uniform ye ko wow man kawa yirngam, kawa jngem, kawa soo heiñ heiñ tangwa ka yong ka toh bait da ka Kot wei da kyntu ko ya ki paidbah wow e lang yei kyrchaan yow man kam ka MP na ka jylla yow yasaaid yei eh ki paidbah.

Da ong ko wa da dep wow lai yachem wa kiwa yahkhmat waphær waphær ha waroh 36 tylli ki Constituency nadooh kiwa yahkhmat niam, kiwa yahkhmat seiñ saaiñ pyrthai wei da chaniah ko ha u Blai wow e u yei laad.

Related posts

Ya ka Election cha GHADC daw pynbna hadien ka Delimitation

April 15, 2026

Baam smai u Samrat Choudhary kam u CM wa thymme ka Bihar

April 15, 2026

Hawa pynsñiaw yei wei ym em sñiaw toh ko wow kynthah ya kiwi, ka Dr. Ampareen da ong ko wa kam ka kyrtong daw tyrwa ki yong ka hi ki phang ki wym em yatoh iyi iyi waka poisa neibhah wa ka mih ko yow chakri paidbah, ymtoh wow yataan tylle, ymtoh wow kynthah ya uwon uwon hanla em kiwa ya kawang neibhah wa da ya myllien heipor Election.

Da ong ko leh wa ka NPP ymtoh ka Party yong kiwa na baar tangwa ka Party yong ki Khasi, Jaiñtia wa Garo kiwa man kiwa chong chnong yong kani ka jylla wei da paan ko yei kyrchaan wow man kam ka manbei wa nyngkong na Shillong wow man MP.

Heijooh i por da ong ko wa ki phang kiwa yatoh waka jaitbru daw rah yow yasaaid manda e ki paidbah yei jop.