Ynnin ka sngi 26 tarik, u Wailadmiki Shylla, MLA ka 2 Jowai Constituency da e yarap u T. 1 lak cha ka Jaintia Career Coaching Centre kam chibynta u yarap e mynsien ya kiwa pynlai kani ka Centre heiyatoh i e sikai ko ya ki khynroo khyllood wa pynkhreh neibynta ki Exam yaleh kreh waphær waphær kam yong ka UPSC, MPSC, DSC, SSC, Banking wa kiwi.
Hawa klam neiliang u Wailadmiki Shylla da e mynsiem u yaki khynroo khyllood wymtoh u dooh mynsien ki hawa pynkhreh yaki Exam waphær waphær, tangwa toh u kreh chitom wei kut yumut yow poi chaka thong wa ki da mut da mang ki.
Chooh chooh kyntu u ya ki khynroo khyllood ka thaaiñ Jaiñtia wow kyruiñ haroh ki dei wow seiñ khih seiñ kreh næ yieñ hei kjat yong ki wym wow yooluti ware du yei kreh sorkar.
Da pynkut u yei klam deiwa e ki kyntien kyrkhu kyrdoh wa kani ka Centre u nanglai ko chaphrang.
