Ka sorkar Meghalaya da pynbna ko da ka thma pyrchah yei drugs ynne ka sngi deiwa booh T. 10 klur na ka mang poisa ka jylla yow pyndooh jait yei drugs hapoh ka jylla.
Neiliang u Montri ka chnat Social Welfare, u Paul Lyngdoh da pynbna u yeini ha ka yalang wa da pynman waka Shillong All Faiths Forum (SAFF) yow yaklam hajrong ini i kaam.
Da pyntip u leh wa ka sorkar daw booh bhah ko T. 10 klur chi snem yow e leh cha ki seiñ niam yow ye ki wow yaleh pyrchah yei drugs.
Chooh chooh da ong u wa ka yalang ynne da man ko kawa mih soh mih sla wei da yoh leh yei buit na kiwa yahkhmat niam.
“Da yaklam i yeiwa emkaam wow pynjoor ya ki kaam pyrchah yei dih drugs, u pynkhlan leh yei e syllok kamjooh ki pynsñiawthooh paidbah wot hapoh ki skur deiwa pynman kam chibynta ki lynnong e sikai,” da ong u Paul.
Da pynkynmoo u leh wa da dep jied ya ki 7 tylli ki District kam kiwa boon bha kiwa pynemkaam drugs wei daw pynjoor ya kani ka thma ha Shillong kawa man kam ka thaw wa chah ktah bha.
“Ha ini i wa sdang daw phiah ya ka Shillong ha kiwa boon ki bynta wei daw yachem leh man-i-por yow tip kiwon kiwa pynpoi wa kiwa dai yei drugs,” da pyntip u Paul Lyngdoh.
U Montri da pyntip u leh wa ka sorkar daw pynkrehkaam ko ya kiwa boon ki laad yada hapoh ka aiñ Prevention of Illicit Traffic in Narcotic Drugs and Psychotropic Substances (PITNDPS) Act 1988 heiwa kani ka aiñ da ong ko wa lada boon næ kajiak i kem drugs, lada kiwa chah kem toh kiwa jooh man kam kiwa dai drugs daw ye u pynngat ki hapoh ka aiñ. Ya kini daw kem ki nyngkong 3 bnai iwa ye wow pynku cha chi snem.
