Jowai: Ka Fully Niang kawa naka chnong Shangpung Pohchnong West Jaiñtia Hills District da yoh ko yaka State Award for Handicraft Artisans yong u snem 2018-2019 napyrdi ki 5 ngut kiwa da chah jied hapoh ka jylla naki District waphær waphær lyngba i man pliah yong ki wow chna wow thaiñ yaki tiar tar wa ye u pynemkaam ha yung wa kiwi kiwi.
Kani ka State Award man ko chibynta wow e mynsien ya kiwa em sap wow yakhun wot haki rynsan yakob kyrdan ka ri (National Level) hei wow pynyoo cha kiwi yaka dustur riti yong ka jylla lyngba i sap chna sap thaiñ (Handicraft). Heijooh i por yow nang e mynsien chooh chooh yaki wow chimkhia ki yei kaam wei u nang pynpliah ki leh hei chna hei thaiñ nalor wow man ko leh ka laad e khih e kreh.
Ya ka Award wa kynthup yaka Momento, ka Certificate wa ka song poisa wa T. 50,000, ka Fully Niang da yoh pdiang ko ynne ka sngi lyngba u Deputy Commissioner ka West Jaiñtia Hills District u Garod LNS Dyke ha kamra krehkaam yong oo hei emlang u General Manager District Commerce & Industries Centre West Jaiñtia Hills District u P. Toi.
U P. Toi khana u wa kiwa yoh yaka State Award daw yoh haroh ki kamwa T. 2 lak neibynta u chna yaka yung kreh (Work Shed) wei 3 lak won u pynlut neibynta u e sikai ya kiwi kamjooh u thied yaki tiar ki tar.
Ka Fully Niang man ko leh ka kynthai wa nyngkong napoh ka District wow yoh ya kani ka Award wei i yoh yong ka ya kani ka naam toh hajrong i pliah ko wow chna yaki kriah (Cane Basket), ki kpieñ, ki chah chkoor, ki khadu deiwa thaiñ lyngba ki chken (Cane Jewellery Handicraft).
Ha u snem 2018 da yoh haroh ko u chimbynta haka Cane Jewellery Training wada pynman ha Shangpung lyngba ka Scheme SC/ST Hub. Kamtæ toh lyngba i chemphang yong ka haki 14 snem wada lai wow pynpliah ko pyn yaka hi hei wow pynwandur pynyoosuk yaki jait wa thaiñ wa chna iwa khian tam leh, da pynman yaka wow yoh ya kani ka khusnam.
Kam ka manbei wa pyndap pynbiang samen yaka yung ka sem deiwa chaniah ha kani ka kaam, booh ko i kyntu yaki khon khynroo nadooh kiwa em yei stat i tip wym toh u yang ki du yei khih sorkar neibhah i khih wa suk tam toh i khih yong i da i hi hanla hap maad yei eh i khoo.
“U Blai da booh u jar jiar i sap, chong ha samen wow pynemkaam yaka, toh u sñiawthooh ya jar jiar i sap wei u khreh chitom, heijooh i por wow chim kabu yaki laad e sikai khnang yow ye u pynpliah yei kaam wei yow poi cha ka thong,” ong ka Fully Niang.