15 49.0138 8.38624 1 0 4000 1 https://wyrta.com 300 0

Advertisement ad1

Advertisement ad1

T. 15 lak yoh ka skur Sohmynting LPS wow chna thymme ya ka skur na ka JHADC

0 Comments

Jowai : Ka Sohmynting Lower Primary School, Dongneiñ kawa da seiñ hajrong ka yurim wow chakri ya ki khynnah ha i stat i tip da yoh yarap ko ya ka song poisa wa T. 15 lak na u MDC ka thaaiñ, u Madonbai Rymbai uwa man leh u CEM ka JHADC neibynta wow chna ya ka yung skur wa thymme.

U Rymbai hawa e yei klam da ong u wa ya kani ka yungskur wa thymme na ka T. 15 lak, T. 10 lak toh kawa yoh lyngba ka Council Fund katwa 5 lak won na ka MDC Scheme yong u snem 2018-19.

Kamtæ kam ka dak i sdang wow chna thymme ya kani ka yung da booh mooyurim noh ya ka ynnin ka sngi.

Da ong u wa i bor wa khlan tam kam ki manbei manpa wa ye ki u e ya ki khon toh i stat i tip wow pynkupbor ya ki khynnah, kamtæ da kyntu u ya ki wow phah skur ya ki khon yong ki wei wow pyntikna wa ki khon yong ki ymtoh u pep skur ki chiteiñ por donhi.  

Chwa ini neiliang u Monjur Pyrtuh uwa man kam u Headmaster ka skur, da pynsñiaw u ya i eh i khoo wa yachem ki na ki por cha ki por nadooh i wym biang ki kamra, wei khamtam katni wa da sdang jæd da pai i tnoom yung iwa da pynchitom yei thij i pyrkhat ka SMC deiwa kyntu ya ki bor wow leh yeiwa emkaam.

Chooh chooh da pyntip u leh wa khlieh snem ka Dong pynman ko ya ka Fete neibynta wow kyntu kynrong ya ka yarong poisa wow pynlai ya kani ka skur tangwa boonsien ka poisa da pynlut du wow su tulop ya kiwa sikai katwa wow chna pynmiat won ya ka skur ym dap poisa de.

Ha kani ka sngi da yoh leh yei klam na u MDC warim ka Tuber u Helping Phawa, u William Pyrtuh uwa man kam u Waheh Dong, u Bro Pyrtuh wei ya ka yalang da pynlai da u Lutmon Pyrtuh uwa man kam u Chairman ka SMC ka skur.

Advertisement ad1

0 Comments

Leave a Reply