Shillong: U Deputy Chief Executive Member ka Khasi Hills Autonomous District Council (KHADC), u Gigur Myrthong da pyntip u wa i yoh lum dan ka Council ha u snem 2019-20 man ko T. 17,87,13,074. Ya ini u Dy. CEM da pyntip u hawa jubab yeiwa kylli wa da wanrah da u PN Syiem ha ka dorbar lyiur ynne ka sngi.
Hawa jubab chooh chooh ya iwa kylli pynrap hajrong i yoh lum dan lyngba ka Land Revenue wa Forest, u Myrthong da pyntip u wa ka KHADC da yoh ko T.25,54,669 naka Land Revenue, katwa naka chnat Forest da yoh ko T.2,35,68,611.
Da pyntip u leh wa i yoh lum khajna na ki Minor Minerals man ko T.5 Klur wei na ki Major Minerals man ko T.1,53,29,855.
Hawa jubab yeiwa kylli pynrap yong u RV Lyngdoh hawa yatoh waka tulop ha KHADC, u Deputy CEM da pyntip u wa haka chibnai, i lut man ko T.4.5 Klur wei haka chisnem da poi cha ka T.54 Klur.
Hawa yatoh wa i bhah kawa toh naki marpoh khyndaw da ong wa ka sorkar ym jooh e yukheiñ deiwa che, neiliang yong ka Council daw yachem ko waka sorkar wow paan ya i yukheiñ wa biang hawa yatoh wa kani ka dan.
Hawa yatoh wa i kylli u Gabriel Wahlang hajrong i bhah yong ki marpoh khyndaw, u Deputy CEM da ong u wa i bhah neibynta ki marpoh khyndaw yaki Minor Minerals man ko 60:40 katwa yaki Major Minerals man ko 75:25.
