U Montri ki Kaam Pohyung ka ri, u Amit Shah da wan u wow yalap Election neibynta ki kyrtong BJP hapoh ka jylla hadien wa ini wa dep da wan u National President ka Party u JP Nada wa u National Secretary, u Rituraj Sinha ha Shillong heiwa u Amit Shah won da lai yalap Election u cha Ri-loom Garo.
Ynnin ka 16 tarik Amit Shah da lai chimbynta u ha ka yalang paidbah wa da pynman ha Don Bosco Field, Tura heiwa da kob u wa ka Bharatiya Janata Party daw man ko kawa boon MLA dooh hadien wa pynbna Result.
Da ong u wa u Prime Minister ka ri, u Narendra Modi kwah u wow pynku ya ka thaaiñ North East waroh kawi wei da chimkhia u yeini deiwa wan cha kani ka thaaiñ la 51 sien wei ym jooh em u Prime Minister wa wan kat deini sien sang.
Da ong u leh wa neidaw wa ki sorkar Meghalaya da ieh beiñ wei ym em biang pynlai yei kaam i jaam da pynpoi yei duna ka yarong poisa cha T. 1849 klur ha u 2022-23 wei ini da jia du neidaw wa joor ka baamtooh i wym jooh yoo heiwon heiwon leh hapoh ka ri.
Katkam ka bui (Report) ka RBI, da ong u wa ka Meghalaya toh ka jylla wa suki dooh i roi i paar hapoh ka ri. Wei ini toh kat ki Scheme wa poi cha Meghalaya ym yoo de ki wei ka BJP ye ko wow pyndooh ya kini ki kaam baamtooh.
Da kdaw u leh wa hadooh katwon ka sorkar u Modi da ye ko wow wanrah yei suk wei man chngaaiñ ka imlang sahlang heiwa da wiar ki khang chnong, ki yasiat, ki maham tympdung bomb, ki seiñ kieñ suloi wa i yap ki khynroo hapoh North East heiwa palat 8,000 ngut ki dkhot ki seiñ wa boon da wan ki wow pyndem wei wow psiah biang chapoh ka imlang sahlang.
Kamtæ da kyntu u ya ki seiñ wa em hapoh Meghalaya wow wan ki chakhmat wow embynta ha ki kaam pynroi u Narendra Modi.
Chooh chooh da ong u wa ka sorkar u Modi da pynku ko da awjan 150% ka Central Grant cha ka thaaiñ North East ha kini ki 8 snem hawa nujor ha ki 10 snem ka sorkar UPA kawa e T. 13,000 klur tangwa katni ka sorkar BJP da e ko kamwa T. 22,000 klur.
“Ha ki 8 snem ka sorkar u Modi da pynlut ko kamwa T. 5,000 klur yow chna ya ki National Highway ha Meghalaya heiwa ha ki 40 snem leh ym jooh em kawon kawon ka sorkar pyrdi kawa da e hadooh kat deini,” da ong u Amit Shah.
Chooh chooh ki sarok wa da chna ha Meghalaya hapoh ka Pradhan Mantri Gram Sadak Yojana ha kini ki 8 snem toh palat ya iwa ye u chna ha ki 20 snem nachwa. Hawa nujor wa u 2014, da booh 5 chah ki Optical Fiber ha Meghalaya da ka sorkar pyrdi wei da dep ko wow pyndait 6,000 tylli ki Mobile Tower wa thymme.
“Ha Meghalaya, 21 lak ngut ki bru da yoh myntoi ki hapoh ka PM Garib Kalyan Anna Yojana, 2 lak ngut ki warep hapoh ka PM Kisan Samaan Nidhi, 68,000 ngut ki wa dooh da yoh myntoi ki hapoh ka PM Awas Yojana wa palat 1.5 lak ngut ki manyung wa dooh hapoh ka Ujjwala Yojana.”
U Amit Shah da kular u wa manda yoh ki wow chna sorkar, daw chna ya ka Medical College ha Garo Hills yow lait ki khynroo khyllood wow lai cha baar yow lai puræ Doctor wei ini daw pynku ko leh yei boon em ki Nurse.
Da khana u leh wa da wai 39 tylli ki Eklavya Model Residential Schools hapoh Meghalaya. Wei daw sdang leh wow e sikai ha ka ktien Garo.
Da pyntip u leh wa da rai wow booh ya ki IT Park ha Ri-loom Khasi, Jaintia wa Garo. Daw chna leh ya ka Special Economic Zone (SEZ) yow ye ki khynroo wow yoh kreh yow pynku ya ka thaaiñ. Daw booh bhah T. 100 klur neibynta ki karkhana khian namo ki MSME manda chna ya ka sorkar ha Meghalaya.
Da pynkynmoo u leh wa yow pynku ya ka thaaiñ North East da dep sdang leh ya ka PM-DevINE (PM Divine) Scheme wei da booh bhah T. 6000 klur hapoh ka mang poisa (Budget).
U Amit Shah u pteiñ u lai yalap Election sa ha ar thaw myntu ha Garo Badha wa ha Dalu.
