Ka sorkar Meghalaya hei pyrchang wow pynsmat u pynpoi ya ki kaam pynroi ha ki thaaiñ palatsor, ynne ka sngi da saam ya ka poisa yarap ha kylleiñ ka jylla cha ki 53,832 ngut kiwa yoh myntoi neibynta wow pyntikna yei bha i miat ki warep wei ya kani ka poisa kawa da poi T. 26.91 klur toh hapoh ka FOCUS+ kawa man leh kawa le hei heh dooh deiwa phah da ka Direct Benefit Transfer kawa poi bait cha ka Account ki warep.
U Montri Rangbah da saam u leh yei yarap poisa wa T. 1.66 lak tyngka hapoh ka FOCUS+ Farmers’ Welfare Programme neibynta ki 3,329 tylli ki manyung ki warep ha Chokpot, South Garo Hills District. Da pynwandur ya ka Scheme FOCUS+ wow e myntoi yaki warep ha kylleiñ ka jylla, wei man ko leh wow pynyaar yaka Scheme ki warep kawa heh tam ha Meghalaya ka ‘FOCUS’ (Farmers Collectivization for Upscaling Production and Marketing System). Deiliang kini ki ar Scheme (Focus wa Focus+) da e yarap poisa yaki warep ha Meghalaya kiwa da yoh mar T. 10,000 chi yung.
Ha kani ka sngi hapoh ka Rural Backyard Piggery Scheme, ‘PROGRESS’, da dep saam 2000 tylli ki khon sniang (3 tylli ki kynthai wa uwi u sniang chynrang) cha ki 500 tylli ki manyung ki warep na South Garo Hills District. Da saam leh yaki syiar Kuroiler cha ki 500 ngut kiwa yoh myntoi. Ka PROGRESS Scheme i thmu ko toh wow pyntikna ya ka kamai kajih kawa neh wei kawa pynmyntoi ya ki warep lyngba ki kaam ri mrad. Hapoh kani ka Scheme da booh thong wow pynmyntoi yaki 10,000 ngut ki warep wa dooh wa duk wei wow pynku yei pynmih dohsniang wei dohsyiar ha ka jylla.
U Montri Rangbah ha kani ka sngi da booh u leh ya u mooyurim neibynta wow chna yaka yung krehkaam ka Chotpot C&RD Block.
Hawa e yei klam ha kani ka sngi u Montri Rangbah da ong u, “I sñiawkmen i wow yoh pynman ya kani ka yalang neibynta i myntoi ki warep, ki Self Help Group wa ki seiñbhalang ha ki chnong ki thaw wei ka sorkar yong i da kreh chitom ko khlem chongngiah yow kyntu yaka kyrdan ki warep ha kylleiñ ka jylla. I thmu yong i toh wow pynku archah yei yoh ki warep deiwa pynbiang ya ki da ki laad i stat waphær waphær ha ka kamai kajih kawa neh slem. Ha kini ki soo snem chiteiñ wa da dep, i da yoh i yei jop ha kiwa boon ki kaam wa da pynkreh yow wanrah yei kylla neibynta i bha i miat”.
Puræ leh: Phah u Conrad yaka poisa wa T. 30 klur cha 60,000 tylli ki manyung ki warep hapoh ka FOCUS+
