U Montri Rangbah ka jylla, u Conrad K Sangma ynnin ka sngi da booh u ya u mooyurim neibynta ka Integrated Block Development Complex ha Nongstoin, West Khasi Hills deiwa emlang u C&RD Minister, u Hamletson Dohling wa u MLA ka thaaiñ, u Macmillan Byrsat.
Ha kani ka sngi da e leh ya ka poisa yarap neibynta ki warep ya u tit wa tip kam u Oyster Mushroom hapoh ka Meghalaya Mushroom Mission wa kamjooh ka yarap poisa cha ki warep hapoh ka FOCUS.
U Conrad da ong u wa ka sorkar da yaleh ko wow pynku ya ki thaw wa sahdien wei wow wanrah yei roi i paar ha waroh ki kdong ki chmiang ka jylla.
Da ong u wa deiwa wai ya ki Block Office wa thymme daw pyntikna wa waroh ki yarap ka sorkar u poi ki cha ki paidbah neibhah ki yung krehkaam ka sorkar ha ki thaaiñ palatsor toh kiwa da sih da pra wei deiwa chna pynthymme da yooluti wa daw wanrah ko leh yei chakri wa biang.
Da khana u leh wa ka sorkar da booh bhah ko T. 3 klur kawi ka Block yow pynchna ya waroh ki 46 tylli ki Block ka jylla.
Heiyatoh wa u sarok, u Conrad da ong u wa ka sorkar da yaleh kow wo pynbha ya kiwa boon ki sarok ha West Khasi Hills kam ka sarok Nongsoin-Maweit, Nongstoin-Wakhaji wa Nongstoin-Rambrai-Kyrshai kiwa waroh da sdang wow kreh.
Chooh chooh da khana u wa da booh T. 26.5 klur yow chna pynmiat ya ki sarok chnong ka Nongstoin.
Da khana u leh wa palat T. 300 klur da dep pynlait cha ki 35,000 tylli ki SHG hapoh ka jylla ha kini ki soo snem wa dadep.
