Shillong: Ka sorkar da dep ko wow pynlait ya ka poisa T. 316 klur yow su ya ka nong cha kiwa kreh mylla 100 sngi næ MGNREGA, wa T. 218 klur neibynta wow thied ya ki tiar ki tar. Ya kani ka poisa da pynlait da ki Deputy Commissioner wa ki BDO yong ki Block nadooh ka 25 tarik u Wisu hadooh 7 tarik uni u bnai.
Hawa klam ynnne ka sngi wa ki laad pathai khubor, u Prestone Tynsong uwa man kam u Symbood Montri Rangbah ka jylla da pyntip u wa da ini i pynlait ya katai ka poisa da ye wow yarap cha ki 5.45 lak tylli ki manyung da kammon kammon kamwa T.4500 kawi ka manyng da yoh myntoi ki wow thied ya iwa emkaam ki.
Ha kawi won ka liang, da pyntip u wa ka sorkar da dep ko leh wow pynlait ya ka poisa wow yarap cha kiwa mylla kiwa da em pyrtuid waka Meghalaya Building and Others Construction Workers Act, kawa man T.1000 chi tayaw ha ka 7 tarik uni u bnai.
Da pyntip u wa da em 22, 826 ngut kiwa mylla kiwa da pynpsiah pyrtuid, wei i su ya ka T.1000 da man ko nadooh ka 23 tarik u Wisu, deiwa pyntip leh wa ka sorkar da phah ko yaka chnat Labour wow pynlait noh ya ka poisa wa dang sah ar tyaw ha ka 11 tarik uni u bnai.
Hawa yatoh wa kiwa mylla sngi wa kynthup leh ya kitu wa dai khutia harood sarok, u Prestone da pyntip u wa hadooh ka 8 tarik uni u bnai, da kut i pynpsiah pyrtuid yow yoh yarap na ka Chief Minister’s Relief Against Wage Loss Scheme, hadooh katni da em 98,000 ngut wei kani ka yukhein dang ku neibhah ym pu yoh lut yaka yukheiñ na ki BDO.
Da ong u wa hadooh wow poi lut ki yukheiñ kiwa mylla ye ki wow poi chadooh 1.20 lak ngut, wei hadien daw thap ya i pyrtuid wow bichaar wei haka tayaw wow wan daw ye u pynbiang yei su kamwa da booh T. 700 chi tayaw.
Discussion about this post