Kam chibynta wow yarap ya ki chnong kiwa da kreh wow pynneh pynsah ya ka bei rymaw, da saam ya ki Cheque hapoh ka Payment for Ecosystem Services (PES) kam chibynta ka thong krehkaam ka sorkar wa tip kam ka Green Meghalaya ha ka yalang wa da pynman ynne ha Tura heiwa da saam ya kini ki Cheque da u Montri Rangbah ka jylla, u Conrad K Sangma.
U Conrad hawa e yei klam da klam u yei emkaam wow pynneh pynsah ya ka rymaw deiwa ong wa i ah dieñ da ktah bha ko yei man ka suñbneiñ hapoh pyrthai, da klam u leh yei sdang stang ki khloo wa i sngat ki um changpet.
Da khana u leh wa ka sorkar da kreh ko wow pynkhai im biang ya ki um changpet kamtæ da wanrah da ka Green Meghalaya Scheme deiwa e yarap poisa cha kitu ki chnong wa kreh wow pynneh pynsah ya ki khloo ki kjam.
Heiyatoh wa ini da booh T. 50 klur hapoh ka PES Scheme heiwa da pynlait T. 15 klur wei daw pynlait ya kani ka poisa chisien chi snem. Kamtæ da pynchlur u ya kiwa pynlai chnong wow chim kabu ki ya ini.
Ya kani ka poisa yarap daw e leh cha kitu ki chnong kiwa da kreh chwa wow pynneh pynsah ya ki khloo ki kjam, kamjooh ka um, i khyndaw, kiwa pynmiat ya ki soodong ka chnong wa kiwi kiwi de. Chooh chooh da yooluti wa lyngba ini daw pynsñiawthooh yei emkaam wow yada wei wow pynneh pynsah ya ka rymaw wei wow kitkhlieh leh ki juk wow wan.
Ha kani ka yalang da saam Cheque cha ki 294 tylli ki chnong yong waroh kawi ka ri-loom Garo kawa da poi 5,86,64,857.27.
Da emlang leh ha kani ka sngi wa u Swapnil Tembe, Deputy Commissioner ka West Garo Hills, u Manoranjan R. Marak, MCS, BDO-Rongram Block, ka Rikse R Matak, Chief Executive Officer ka Tura Municipal Board, u Ganesan P, DFO Tura, u Gunanka D.B., Additional Project Director-CLLMP & MegLife, u James Kharkongor, DPD-CLLMP. Ki sahep ka chnat Agriculture, Forest, ki dkhot ka Nokma Council wa kiwi de ki chnat sorkar.
Ya ka yalang da pynman da ka Meghalaya Basin Management Agency wei da yoh kyrchaan poisa naka World Bank hapoh ka Community Led Landscape Management Project.
