T. 5 klur toh u su ki Doctor wa pass Quota : FKJGP – JH

Jowai : Ka FKJGP Jaiñtia Hills ynne ka sngi da lai yachem ki wa u Montri ka tnat Chait i Khiah (Health) u A.L. Hek hei yatoh wa i duna doctor ha ki PHC wa ki CHC wa em ha East wa West Jaiñtia Hills, i wa ym em DM&HO ha ka East Jaiñtia Hills District wa i sah ka tulop kiwa kreh ka kani ka tnat.

Ya ka phang wa duna ki doctor kam ha Jarain PHC, Namdong CHC, Nangbah CHC, Iooksi PHC wa kiwi kiwi ki PHC wa CHC ka seiñ da kdaw ko toh wa em ki Doctor hadien wa pyndep ki yei puræ MBBS yong ki da ka quota ka sorkar da kyntait ki u kreh wa ka sorkar. Em won ki doctor wa kreh cha kini ki CHC, PHC won da lai puræ pynpliah biang ki du hadien kattu katni por wa kreh ki, neitæ i daw da duna doctor ha ki PHC, CHC.

Neiliang u Montri da ong u wa duna ware ki Doctor Specialist hapoh ka jylla kamtæ ym yohsa de da haap phah lai puræ chooh ya ki Doctor.

Ka seiñ da pachat yumut ko leh wa ya ki doctor ki wa pass lyngba i puræ quota ka sorkar ki wym kwah u kreh hapoh ka sorkar manda ieh ki toh u su ki cha ka sorkar T. 5 klur heithaw T. 25 lak kam wa man katni iwa suk bha u su ya kiwa boon.

Related posts

Hiar lai pait u Wailadmiki ya ki sarok wa da pynbna wow chna noh hapoh ka Jowai Constituency

May 4, 2025

Phah u Himanta wow tyngkheiñ yei kjat kiwa yaroh ya ka Pakistan

May 2, 2025

Da yaklam ya ka phang wa ym pu yoh DM&HO ka East Jaiñtia heiwa u montri da ong u wa ya kani dang sah ko neidaw wa ym pu em chong District Planning Committee (DPC) ki.

Ka seiñ FKJGP leh da wanrah ko yei sah kreh ki Nurse, ANM wa kiwi kiwa da psiah kreh hapoh i lai puræ quota heiwa hadooh katni dang neh bait ki kam ki Temporary Staff heiwa da toh hok u yoh ki kam ki Permanent Staff. Heijooh i por leh da klam yow pyllait noh ya ka tulop wa sah yong kiwa kreh ka Health Department hapoh ri-loom Jaiñtia.

U montri da ong u leh wa ym ye u dooh tulop kiwa kreh hapoh ka sorkar neibhah waroh ki wa kreh ka sorkar wa em pyrtuid hi hapoh ka ‘Employee Database’ ymtoh u dooh tulop ki. Da kular u leh u pynyoh ya ki tulop ki wa dooh lada em ki hapoh ka Database wei da phah wanrah u leh ya ka seiñ ya kiwa em pyrtuid hapoh ka Database ki wa dooh tulop yow pynbiang pynbait ya ka tulop ki.

Kamwow pynkynmoo da kular u su ya ka tulop wa sah le bnai hapoh le tayaw tangwa dang ye u pyllait dang du chibnai don hi.