Shillong: Ka sorkar jylla da pyntip ko wa daw pynlut nyngkong ko T. 50 Klur wow sdang ya ki 9 tylli ki Community College yow yoh laad kiwa kwah u lai puræ cha ki kyrdan wa heh khamtam kitu wa sah cha ki thaw nongkyndong.
U Dr. Mukul Sangma da ong u wa nyngkong u pynlut T. 50 Klur wei daw pynlut won sa T. 53.106 hadien.
Da pyntip u leh wa daw booh ya kini ki Community College ha ki 2 tylli ki kyrdan wa tip kam ka Ground Field heiwa ki College kiwa da em chwa daw yoh yarap ki chisien T. 2 Klur wa sa kawi ka kyrdan won wa tip kam Green Field toh ki wow chna thymme heiwa daw e T. 10 Klur ka wi.
Da ong u leh wa hadien wa da sdang, iwa boon dooh i lut toh neibynta ka tulop kiwa sikai ka wow bood ya ki kyndon ka UGC wei u leh ya ini toh yow yoh ya kiwa sikai wa nep jabieñ dooh wei kini ki kreh leh toh ki wym ye u kyrriah na kawi ka College cha kawi tawon.
Hapoh ka Phase-1, ki College wa haap hapoh ka Ground Field kynthup ko ya ka Nongstoin College, Tirot Sing Memorial College, Ri Bhoi College, Shangpung College wa Jaiñtia Eastern College, Khliehriat.
Ya ki Community College wa thymme (Green Field) won daw chna ha Tura, Ampati, Chokpot wa ha Rongjeng, wei kini ki ki College daw em ki ya ka Science, Commerce wa Arts.
Chooh chooh da ong wa da sdang ya kini ki Community College yow pynduna yei hiar kiwa na nongkyndong cha sor wow thooh thaw lai puræ kamjooh leh u yarap ko ya kitu ki wym yoh laad wow lai cha sor.
Da ini daw pynduna ko leh yei chem chitom ki thaw puræ wow e thaw puræ ya kiwa boon ki khynnah deiwa em ki thaw puræ pyn cha jan ki chnong ki.
Discussion about this post