U Montri Rangbah ka jylla, u Conrad K Sangma ynne da pyntip u wa lyngba ka Focus waka Focus+ Programme, ki warep hapoh ka jylla kiwa em kamwa 4.5 lak ngut daw yoh yarap ki T. 500 klur chi snem ha ki Account yong ki man-u-snem wei lada kheiñ ha ki 10 snem daw man ko T. 5000 klur. Kani ka poisa u lai ko cha ki seiñ ki warep namo ki Producers Group ha ka jylla wei daw ye ki wow rai kammon wow pynemkaam ya ka.
Ya ini waroh da ong u ha ka yalang neibynta ka FOCUS Programme wa da pynman ha Nongstoin, West Khasi Hills.
Lyngba ka Focus wa Focus+ daw e yarap poisa T. 5000 samen cha ki Producer Group (PG) wei hapoh kini ki ar Programme ki warep ha kawi ka manyung kiwa em ha palatsor u yoh yarap poisa ki T. 10,000.
Ha kani ka sngi kiwa yoh myntoi na ka Focus, ki Producer Group da yoh ki ya ki Cheque katwa hapoh ka Focus+ da e ya ki da ki ‘Focus Card’. Ka poisa hapoh yong ka Focus+ daw pynlait ya ka kajiak chisien (Installment) cha kiwa yoh myntoi. Lyngba ka FOCUS hapoh West Khasi Hills, em hadooh 1957 tylli ki PG heiwa ki dkhot da yoh ki mar T. 5000 chi yung wei waroh ka poisa wa da e man ko T. 62,85,000 wei kawi ka manyung u yoh ko T. 1000 ha ka bhah wa nyngkong katwa T. 4000 won ha ka bhah wa ar.
U Montri Rangbah da e u leh ya ka Community Investment Funds wa T. 1.14 klur wow kyrchaan ya ki Self Help Group ki kynthai na ki 44 tylli ki Village Organisation. I yarap won lyngba ka YESS Meghalaya cha ki seiñ ki khynroo wa i e ya ki khon syiar wa ki khon sñiang hapoh ka ‘Progress’ Scheme leh da saam ya ki.
Da ong u wa ha ki por nachwa da e T. 50 klur cha ki SHG ka jylla tangwa nadooh u 2018 wot hapyrdi 2 snem wa pynthut ka khlam COVID-19 ka sorkar da e ko T. 380 klur cha ki SHG ha ka jylla.
Da khana u leh wa lyngba kiwa boon ki Mission, ka sorkar da pynlut ko T. 700 klur yow pynku yei kaam rep ha kini ki soo snem chiteiñ.
