T. 51 Klur tam u yoh poisa ka sorkar jylla naka sorkar pyrdi wow pynku yei pymmih dakha hapoh jylla

Shillong: U montri ka tnat Fisheries ka jylla, u Comingone Ymbon da ong u wa ka sorkar jylla daw yaleh ko wow pynku ya i pynmih dakha hadien wa yoh yarap ko na ka sorkar pyrdi heiwa da pyntip u wa ka tnat ha u Naisaphra da phah ko yeiwa emkaam ko cha ka sorkar pyrdi heiyatoh wa ka scheme ka sorkar pyrdi wa tip kam ka “Blue Revolution: Integrated development and management of Fisheries’ during the year 2018-19”.

“Daw sdang i ya ka nadooh wa kut uni u bnai wei hadien wa pynkrehkaam ya kani ka scheme daw ye wow pynku yei bor pynmih dakha ka jylla cha ka 7000 metric tonne lada lai bait ki kaam waroh,” da ong u Ymbon.

Da pyntip u leh wa i wanrah ya ki dakha na baar jylla daw pteiñ chooh chooh i.

“Da yoh i ya ka poisa wa T. 51,97,90,000 wow chna ya ki nan wa thymme, wei em boon ki bynta hapoh kani ka scheme,” da pyntip chooh chooh u Ymbon.

Related posts

Sdang ka sorkar da ka Community Public Private Partnership deiwa e yarap Rs. 106 klur

November 28, 2024

Ym pynyieñ kyrtong MDC ka KHNAM na JHADC

November 28, 2024

Chooh chooh da ong u wa ka tnat daw chna ko hadooh 1000 hectare ki nan dakha wa thymme ya ki bru samen, da pynrap u wa na kini ki nan daw ye u pynmih hadooh 7000 metric tonne ki dakha.

Kiwi ki bynta yong kani ka scheme kynthup ki ya i chna ya ki thaw pynmih symbe dakha, ki thaw psan dakha wa jrong kam ki wah khian namo ki Raceway ha ki thaw sorkar.

“Da ong u wa da em chwa 2-3 le tylli kini ki thaw (Raceway) sorkar wei daw ye u pynmiat chooh chooh ya ki. Daw chna leh ya ki thaw dai dakha sorkar wei da jied i leh ya ki thaw wa em ha Shillong wa ha Tura,” da ong u Ymbon.

Heiyatoh wa i wow chna ya ki dukan dai dakha neibynta ki bru samen da ong u wa daw booh wow e kamwa 50 ngut kiwa pynmih dakha wei ye ki wow chna ya ki dukan wei ini chong i ha ka application yong ki wei ka committee daw sylli bniah ko yeitæ. Na kani ka scheme ye u yoh yarap hadooh T. 10 lak.

Heiyatoh wa i kit wei wow pynlai yaaw ya ki dakha u Ymbon da ong u wa ka tnat daw thied ko ya ki Refrigerated Trucks. “Kani ka project daw man ko T. 94,41,40,000 heiwa 60 percent u e na ka sorkar, 25 percent na ki bank, 15 percent won na ki bru wa yoh myntoi”, da ong u Ymbon.

Da pyntip u leh wa ka sorkar da dep pyllait ko T.25.95 lak kam ka First Installment neibynta uni u snem.