U Montri ka chnat Urban Affairs yong ka jylla, u Sniawbhalang Dhar da pyntip u wa ha i lai u cha Delhi, da yoh yei kyrchaan na u Montri ka sorkar pyrdi wa pait ya ka chnat Urban wow e yarap poisa ya ka jylla neibynta ka New Township wa Urban Housing.
Da pyntip u wa neibynta wow booh ya ki Urban Housing, da pynsñiaw ha u Montri ka sorkar India wa emkaam yarap poisa T. 53 klur, heiwa da pyntip u leh wa emkaam yarap leh wow pynkrehkaam ya ka Smart City neibhah kamwa man kattæ i lut man ko mar chiteiñ na ka jylla.
U Sniawbhalang da pyntip u wa neibynta ki Urban Housing, ka sorkar em ko yei thmu wow booh sa kawi ha Shillong, kawi ha Jowai wa kawi ha Tura.
Ha iwi won i liang, u Montri da pyntip u leh wa i pynkrehkaam ya ka Smart City ha nongbah Shillong da lai ko chakhmat, heiwa i chna nadooh ya ka yaw Polo ya ki bynta wa ar, ki Parking Lot wa kynthup ha Laitumkhrah da lai ko chakhmat.
Hawa yatoh wa ka Smart Road, u Montri da ong u wa ka Smart Road u jrong ko kamwa 6 Km, wei ya ini i kaam da hap wow khut Tender biang neidaw wa hei sien wa nyngkong da em du kawi ka Company wa thap.
