Jowai: Ka JHADC man la u bnai su ko hadooh T. 6.52 klur chibnai kam ka tulop cha kiwa kreh wa kynthup nadooh ki MDC hadooh kiwa kreh wa kynthup ya ki sahep hadooh kiwa kreh Muster Roll.
Na kani waroh du neibynta kiwa kreh (Staff) ka tulop man la u bnai man ko T. 3.90 Klur, yeini da pyntip da u CEM ka Council, u MB Rymbai ynne ka sngi hawa yaklam wa kiwa pathai khubor.
Hajrong i chitom poisa ka JHADC katkam wa man katni heiwa ka Council hi chaniah ko na u mar pohkhyndaw (mooyong) lada jia wa chah khang dooh u ha ka Supreme Court, wei lada ye wow wanrah yei pynkylla (Amendment) ya ka Sixth Schedule khamtam ka Article 275(i) wa 280 ki ADC (Autonomous District Council) ka jylla daw yoh myntoi bait ki na ka Ministry of Finance ka sorkar pyrdi wow pyndap yei emkaam ka Council (JHADC).
Da pynrap u leh wa ka Coucil katkam wa man katni ym em yoh myntoi ko na ki 8 tylli ki karkhana khyndaw-bilat (Cement Factory) wa em ha ri-loom Jaiñtia, wei ye wow chna ya ka aiñ wow khrong dan noh na ki wow ye u kyntu kynrong ya ka yarong poisa ka JHADC.
Chooh chooh da pyntip u wa ka Council angnood ko wow pynmiat ya ka thaw uiñke suwari ya ka thaw yong ka kawa em ha Myrkeiñ kawa em ha ka thaaiñ War Jaiñtia kawa ye wow pynmih poisa ya ka Council wei wot ka sorkar pyrdi leh smat ko wow yarap neibynta kani ka kaam. Deiwa pynrap wa manda dep chna ya kani ka thaw ye ko wow man kam ka thaw wa palat ya kiwi ki thaw uiñke suwari ka jylla.
Discussion about this post