Shillong: Ka sorkar India smat ko lada ka sorkar jylla sñiaw emkaam ko ya ka sorkar pyrdi wow tuklar yei eh i khoo wa mih na i pynkreh ya ka luti rel neidaw wa pyrchah ki seiñbhalang.
Hawa klam wa kiwa pathai khubor ynne ka sngi, u montri ka tnat Programme and Implementation ka sorkar pyrdi u D.V. Sadananda Gowda da ong u wa ka sorkar pyrdi sñiawthooh ko yei eh ki paidbah ka wow pyrchah luti rel tangwa emkaam wow pynbait ya ini.
“Kawon kawon ka kaam chwa wow leh emkaam u ya sñiawthooh yumut wa ki bru wa chah ktah.” da ong uni u montri.
Da ong u leh, “Lada ka sorkar jylla sñiaw emkaam ko wa ka sorkar pyrdi toh wow pynbait yeini, ymtoh man i iwa eh wow leh, tangwa chong i ha ka sorkar jylla” heiwa da wa kular u leh wow yaklam wa ka tnat rel manda poi u ha Delhi hei yatoh wa ini.
U Gowda da pyntip u leh wa daw lai yachem u ya u Montri Rangbah ka jylla, u Dr Mukul Sangma myntu i miet wow yaklam hajrong ki kaam wa yatoh wa ka jylla.
U Gowda da wan u cha jylla wow bichaar bniah ya ki kaam wada e poisa da ka sorkar pyrdi ha kani ka jylla, heiwa da ong u wa da mang T. 6,000 klur wow chna luti rel ha kani ka jylla wei hadooh katni da pynlut T.590 klur wei na kani T. 250 klur da su ya ka bai thaw katwa T. 340 klur won wow pynkreh ya kani ka project kawa dang sdang wot.
Da ong u wa kani ka luti rel toh kawa jrong 108 km hadooh wa poi Byrnihat heiwa 2 km em ko hapoh Meghalaya, da pynbna kam ka National Project wei chisien wa pynbna kamni ym mih iwon iwon i ood wa duna poisa.
Da pyntip u leh wa ha ka yalang da yaklam chaphang ki kaam wa mang poisa da ka sorkar pyrdi heiwa kawi na ki toh ka NEIGRIHMS kawa T. 150 klur, ka International Performing Arts kawa da mang T. 156 klur, wa i chna ya ki sarokbah.
Kamjooh ha kani ka yalang da yaklam chaphang i pynkreh ya ka MP Scheme kawa mang T. 5 klur uwi u MP man ka snem. Katkam i ong u Gowda, i pynkrehkaam da lai ki chaaid chaaid wei kamwa 95% i pynkrehkaam hapoh ka jylla man i iwa biang.
Discussion about this post