Ynne ka sngi da pynman ya ar tylli ki yalehke kam chibynta yong ka lympung yaleh Cricket wa tip kam ka 4th T20 Cricket Knock-Out Tournament wa da pynlai da ka Sports Social and Cultural Club, Ummulong.
Ha ka yalehke wa nyngkong, ka Goodwill CC da jop ko ya ka Evergreen CC da 142 Run.
Ya ka kylla-khlem da jop da ka Evergreen CC wei da jied ko wow kawang bol chwa heiwa ka Goodwill CC da ye ko u kamai 268/7 na ki 20 Over, wei kiwa kamai Run boon dooh toh u Carefully Gassah uwa da yoh u 129 Run wa u Oniwanker Sna uwa yoh 72 Run.
Neiliang kiwa kawang bol ka Evergreen CC, u Mewan Tang wa u Esalan Sana da yoh ki mar 3 Wicket.
Hawa kdong ya ka thong, ka Evergreen da ye ko u poi du 126 Run na ki 14.2 Over heiwa uwa kamai boon Run dooh toh u Felicson Bang uwa da yoh u 34 Run, katwa na kiwa kawang bol ka Goodwill u Maolify Sna da yoh u 3 Wicket.
Yei naam Man of the Match ha kani ka yalehke da yoh u Carefully Gassah.
Ha ka yalehke wa ar ka Laphet CC da jop ko ya ka The Legends CC da 3 Wicket heiwa ya ka kylla-khlem da jop da ka The Legends CC wei da jied ko wow Bat nyngkong heiwa da kamai ko 155/9 na ki 20 Over wei uwa kamai Run boon dooh toh u Success Rymbai uwa da yoh u 54 Run wa u Dachange Phawa 29 Run.
Neiliang kiwa kawang bol ka Laphet, u Monday Nelson Lamare wa u Chermi Shylla da yoh ki mar 3 Wicket.
Hawa kdong yaka thong, ka Laphet da ye ko u yoh yei jop hapoh 17.4 Over, neiliang ka Laphet CC uwa kamai Run boon dooh toh u Chongtre I Man Lamare uwa da yoh u 47 Run, wa u Kermiki Bamon da yoh u 38 Run, katwa na kiwa kawang bol ka The Legends, u Dachange Phawa wa u Rainbow Phawa da yoh ki mar 2 Wicket.
Yei naam Man of the Match ha kani ka yalehke toh u Chongtre I Man Lamare.
Discussion about this post