U MLA ka Congress na Rangsakona, u Zenith M Sangma da sympat u ya ka sorkar MDA neidaw i tympleh bordiñ iwa 7 hadooh 9 kynta ha ka chi sngi, deiwa ong u wa ini da ktah i chiboon ya ki paidbah khamtam ki khynnah puræ kiwa pynkhreh ya ki Exam yong ki wei neini daw joor sa ki kaam tooh kaam damok hapoh ka jylla.
U MLA ka Congress da takor u leh ya ka sorkar kawa da pynbna ha ka 16 Thohlakhmi wow sangeh noh ka Load Shedding wei da kob ko wow pynwiar ya ka Load Shedding du hapoh 72 kynta, khlem pynchong yurim chwa, tangwa katni ka jylla da maad biang ko yei jooh.
Da ong u wa katkam ka yutip na ka sorkar, ha ka 5 tarik uni u bnai da pynthymme ya ka Letter of Credit wa ka National Thermal Power Corporation (NTPC), wei ka sorkar da ong ko wa daw yoh biang ya ka bordiñ tangwa da e daw wa khang ka Bank ha Delhi wei hadooh katni ka jylla dang em ko hei langoh.
U Zenith da ong u wa ym kwah u wow ap ya ki daw tangwa ki paidbah kwah biang ki ya ka bordiñ, deiwa pynbaad leh wa kani ka sorkar da leh khlot ko ya ki mat wa ktah ya ki paidbah.