U General Secretary ka seiñ Hynniewtrep Achik National Movement (HANM), u Kyllang Thongni da pyntip u wa da tam spah ngut ki dkhot ka seiñ daw hiar ki cha nongbah Delhi ha ka 01-11-23 yow lai chimbynta ha ka yakhih chong kyllaiñ myngngor ha Jantar Mantar haka 03-11-23 yow dawa na ka sorkar pyrdi ya ki 3 tylli ki phang kiwa ktah ya ka jylla Meghalaya.
Kawi na ki dawa toh wa ka sorkar pyrdi hap ko wow burom yei rai yong ka yung dorbar chna aiñ yow tipmit ya ka ktien Khasi wa Garo hapoh ka 8th Schedule ka riti synchaar yong ka ri India neidaw wa ki jaitbru Khasi wa Garo da dawa ki da slem bha neibhah da biang ki ya ka ktien puræ ha ki skur wei hadooh ka kyrdan Ph.D.
Kawa ar toh wow pynkrehkaam ka sorkar pyrdi ya ka Bengal Eastern Frontier Regulation Act 1873 kawa tip leh kam ka ILP kawa da dep ka yung dorbar ka Meghalaya wow chim rai yow pynkrehkaam yow yada nei wan toor ki bru kiwa na baar jylla.
Ya kitai ki ar tylli ki rai da pdiang da ka sorkar Meghalaya wei da dep leh u phah cha ka sorkar pyrdi cha ka chnat Home Ministry tangwa dang sahkut bait hadooh katni heiwa ka sorkar wa yahkhmat da ka BJP ym pu em em jubab ko.
Kamtæ yow kyrchaan yei rai ka jylla, neiliang ka seiñ HANM da rai ko wa kani toh ka kaam wa yatoh wa i yap i im yong ka jylla wei ym toh wow kynton bait du ha ka yung dorbar chna aiñ wei kam ka seiñ da ong ko wa em i kitkhlieh ya ka jylla wei hap ko wow lai pynman ya ka yakhih ha Delhi.
U President ka seiñ, u Lamphrang Kharbani da ong u wa da dep wow yoh bor yow pynman ya kani ka yakhih ha Delhi wei ka yakhih leh da toh por u lai rah cha Delhi yow pynyoo syndon cha ka sorkar pyrdi wa ki paidbah emkaam ki yei yada.
Discussion about this post