U montri rangbah ka jylla Meghalaya u Conrad Sangma uwa man leh kam u National President ka National People’s Party (NPP) da lai u cha ka jylla Manipur heiwa da emlang leh u North-East Democratic Alliance (NEDA) Convener u Himanta Biswa Sarma uwa man leh kam u montri i chait i khiah ka jylla Assam heiwa da poi ki cha Imphal ynnin ka sngi wow pynbait ya i huri hura ka synchaar khadar hapoh ka jylla Manipur.
Kini da hær ki daka lieñsuiñ wa da pynkhreh yaki kawa hiar ha Bir Tikendrajit International Airport, dep te lai ki jat jiar ki luti ki.
Katkam ka khubor wa da yoh lum, u Conrad da yachem u waki 4 ngut ki MLA ka NPP kiwa da mih napoh ka sorkar synrop wa yahkhmat daka BJP, tangwa ym pu tip wa lada kani ka yalang man ko kawa mih soh mih sla.
U NPP Manipur Unit President u Thangmilien Kipgen hawa e u yei pynche da ong u wa ka BJP ym jooh em chim yumut lang ko wa ki lok yong ka heiwa ym leh ka “Common Minimum Programme” hadooh wow e pyrtuid yaka sorkar synrop.
Deiwa ong leh wa i rukom synchaar toh iwa leh embor iwa da pynman yaki wow dam noh wow kyrchaan ya kani ka sorkar wa yahkhmat ka BJP.
U Conrad wa u Himanta da liwan ki pyn ynnin hi ka sngi.
Naki 4 ngut ki MLA ka NPP, 3 ngut toh kiwa man kam ki montri sorkar.
Kam chibynta wow bood yaki kyndon, neiliang u Conrad da Test leh ya oo ya u COVID-19 manda poi u chapoh ka jylla.
