Jowai: Kam ka dak i pyrchah joor hajrong i mynjur yaka CAB hapoh Lok Sabha, neiliang ka Confederation of Meghalaya Social Organisation (CoMSO) wa em ha ri-loom Jaiñtia, ynne i janmiet da thang ki ya ka dur bula u Amit Shah waka Agatha Sangma ha MTC Stand Iawmusiang Jowai, neibhah wot hapyrdi i pyrchah wa joor hapoh ka thaaiñ North East leh, ka BJP nood bait ko wow mynjur yaka CAB.
“Wot neiliang ka CoMSO da klam che ko wei pyrchah joor leh tangwa ka sorkar MDA pynyoo bait ko yei arsap, nyngkong u Chief Minister ka sorkar jylla u Conrad K Sangma klam che u wa ym pdiang yaka CAB tangwa iwa lyngngoh won wa ka MP wa mihkhmat napoh ka Tura Constituency kawa toh ka diah tre yong oo da e ko i kyrchaan wa khroo yaka CAB,” ong u R. Lamare, General Secretary HYC Jaiñtia Hills.
Ki tip che ki wa kani ka aiñ u baam dooh ko yaka ri waka jaitbru tangwa kattæ leh pynyoo bait ki yei arsap, wei neiliang ka CoMSO kamwa da klam che ko cha ki laad pathai khubor, ki paidbah wow sdang i yakhih nadooh ynne ka sngi, kamtæ e wa kani ka diñ u poor ko ha ri-loom Jaiñtia, pynrap u Lamare.
Heijooh i por ong u, bha wow pyndap yaki yung byndi bar u man bro haka ri yong i hi.
Neiliang u Lawyerson War, President JSU da pynsñiaw u yei sñiawsih wa joor neibhah wa i lai yachem wa ki heh BJP ha Delhi deilang wa u Chief Minister ka sorkar MDA, ki kynhun wa em hapoh CoMSO deilang waki Political Party waphær waphær man i wym em yumut iyi iyi leh.
Da ong wa ini i leh ka BJP toh yow pyndooh jait yaki khian paaid hapoh ka jylla, kamtæ da dawa joor ki yaki 4 ngut ki MDC BJP haka ri-loom Jaiñtia kamjooh ki MLA BJP wa kynthup ya u A.L. Hek wa u Sanbor Shullai wow Resign noh naka Party wa em ki, lym kamtæ ka kynhun seiñbhalang waphær waphær hapoh ri-loom Jaiñtia u sdang ki yei yakhih nadooh ynne ka sngi.
Discussion about this post