Thang ki seiñbhalang ya i bula u DC ka WJH

Jowai : I lai paidbah chirup wei rah lama yong ki 13 tylli seiñbhalang ynne da man ko kawa lai bait heiwa ya kani ka lai paidbah da sdang nadooh na Lad Nartiang, Kiang Nangbah Government College.

Chwa u sdang kani ka lai paidbah da em i yalang tbian  kawa da pynlai da u President ka JSU u ma Rikut Parien heiwa da yoh leh yei klam na u Lone Laloo, President ka HNPF wa na u ma Kolmen Pohshna uwa man kam uwi na ki waheh na Synjuk ki Rangbah Chnong.

Ha kani ka lai paidbah da man ko kawa jai jai heiwa ym em iwon iwon i jia wa sniawsih heiwa da kbai ya ki kyntien yow beh ya u DC, i wow beiñ ya ka sorkar wa kiwi kiwi.

Related posts

Da boonsien dep u yasyllok wa kiwa chongdai madan, phylla u Paul yei pynbaad wa leh yabor

November 24, 2024

Da 4 lak tam ki Vote jop ka Priyanka Gandhi ha ka Election wa nyngkong yong ka

November 23, 2024

Ya kani ka lai paidbah da pynkut ha Madan Jrisaleiñ, Chutwakhu heiwa da em biang ka yalang tbian heiwa da yoh yei klam na ki nongyalam seiñbhalang kiwa da pynsniaw yei pyrchah ya u DC, ya ki pulit wa ya ka sorkar kamjooh leh ya ki ynniaw ngut ki nongmihkhmat ka Ri Loom Jaintia.

Manda kut ka yalang kini ki seiñbhalang da thang ki yei bula wa da booh wei dur u DC ka West Jaintia Hills u Arunkumar Kembhavi.

Kam wow pynkynmoo heini kini ki seiñbhalang da dawa ki wow :

• E noh ko ya ki dawa ki khynnah ka KNGC.
• Kyrriah kaam (transfer) ya u DC, u Arunkumar Kembhavi wa ya u Addl. SP u ma Shemphang Syrti na kani ka Distrik.
• Wow su bailutsan cha ki khynnah kiwa mynsoo ha iwa da jia ha ka 10 tarik
• Wow pyndam noh ya ka FIR khlem booh kyndon pyrchah ki khynnah puræ la KNGC wa ki seiñbhalang.

Da ong ki nongyalam wa ym sangeh ki u yakhih katwym pu yoh ki yeiwa da dawa ki na ka sorkar.