Shillong: U kyrtong hunlang ki lok ka Meghalaya Democratic Alliance (MDA) u Dr. Jemino Mawthoh, ynne ka sngi da thap pyrtuid yaleh MP Election u na Shillong Parliamentary Constituency.
U Dr. Jemino u yakhun u na ka chap ka UDP uwa da kyrchaan lang waroh ki Party kiwa em ha ka sorkar MDA wa kynthup ya ka UDP, HSPDP, PDFwa NPP wei da emlang wa oo ynne ka sngi ka kurim u, ka khon u wa kiwi kiwi.
Da synraan lang ya u Dr. Jemino Mawthoh da kiwa yahkhmat ka UDP, NPP, HSPDP, PDF wa ka NPP nalor kiwi kiwi de.
Hawa yaklam wa ki laad pathai khubor ynne ka sngi, da ong u wa ha kani ka kynti sñiaw em kyrmen u wow rah ya ka thong neidaw wa waroh kiwa emlang da kyrchaan ha i pyrtuid ka MDA.
U Dr. Jemino da kynther u leh ya ka Congress wa pynbaad ko wa ka MDA emlang ko waka BJP tangwa hap jubab ki wa kammon ya krehlang ki waka BJP ha Jaintia Hills District Council nachwa.
U Dr. Jemino da pynbaad u wa toh ka Congress kawa da wanrah nyngkong ya ka Citizenship Amendment Bill nadooh u snem 1947 wei sa ha i por wa man montri rangbahdooh u Dr. Manmohan Singh da klam ya kani ha Rajya Sabha.
Da pynbaad u leh wa i khang baam doh masi toh ka Congress kawa da wanrah nyngkong ha i por wa man montri rangbahdooh ka ri ka Indira Gandhi wei ha chwa wa ka Congress yoh ko ya ka chap da ka kti, ka chap yongka, toh ka masi.
Heiyatoh won wa toh u jied ya ki kyrtong du naka National Party cha Delhi, u Dr. Jemino da ong u wa ki MP ka Congress kiwa da chah jied boon snem ym ye ki wow yarap yaka jylla katwa u (L) Prof. GG Swell uwa man u MP na ri-loom da pynyoo wa samen leh ye u pynkhih ya ka Parliament hadooh wa da yoh u ku cha ka kyrdan Deputy Speaker ka Lok Sabha nalor wa da wanrah u ya ka NEHU wa i pynyoh mantre ya u mooyong ha kani ka jylla wa kiwi kiwi.
Da ong u wa waroh iwa pynbaad ka Congress ya ka BJP katni toh iwa da leh chwa da ki.
Discussion about this post