Ka Environment Cell ka KSU-Central Body da thoh ko cha u Montri Rangbah ka jylla u Conrad K Sngma yow pynsñiaw yei pyrchah yaka Public Hearing ka Star Cement kawa daw pynman ha pchem ka yung krehkaam u DC ka East Jaiñtia Hills, Khliehriat.
Ka seiñ da ong ko wa kani ka Public Hearing yow paan bor yow tih moochuni ha Brichyrnot toh kawa da pynman heipor wa katni em ka khlam COVID-19 wei ye ko wow wanrah yei poor uni u khñiang ha kini ki thaaiñ.
Heijooh i por da ong wa i kyrriah yei pynman yaka Public Hearing na i thaw wa thmu u tih cha Khliehriat man ko pyrchah yaka Sectoin 7 (III) (II)(a) wa (b) ka EIA 2006 heiwa yaka Public Hearing toh wow pynman ha i thaw wa mut wow tih ya uni u marpohkhyndaw.
Kamtæ da suba wa ini i leh wa katni toh yow lait kitu ki bru wa daw chah ktah wow wan chakhmat yow pynsñiaw yei pyrchah wei yow leh dei bor yow tih ya u marpohkhyndaw.
Neiliang ka seiñ da ong ko wa ka karkhana ka Star Cement toh kawa em du kamwa 500 meter naka wah Lunar kawa tooid won cha ka wah Lukha wei kini ki wah neidaw wa pyntooid jakhlia cha ki ym man de ki kiwa hoi wow pynemkaam ki bru. Da kdaw leh yei em ka Narpuh Wildlife Sanctuary pyn heini hajan kiwa ha kani ka khloo da em ki mrad kiwa da yada daka aiñ.
Kamtæ ka KSU da kyntu ko ya u Montri Rangbah wow khang yei pynman ya kani ka Public Hearing kamjooh yow khang yei pynheh kreh kiwon kiwon ki karkhana pynmih khyndaw bilat kiwa em hapoh ka thaaiñ Narpuh.
Ya kani ka jooh ka chithi da phah cha u montri ka chnat khloo u James Sangma, cha u montri ka chnat Revenue u Kyrmen Shylla, cha u MLA ka Sutnga-Saipung u S. Pale, cha u Member Secretary ka MSPCB wa kiwi kiwi.