Kamwa 500 ngut ki kynthai wa puræ College ha Sirsa, Haryana da thoh ki cha u Prime Minister ka ri, u Narendra Modi wa cha u Chief Minister ka Haryana, u KL Khattar yow ujor pyrchah ya uwi u Professor deiwa pynbaad wa da leh khlem akor u ki.
Uni u Professor toh uwa hikai ha ka Chaudhary Devi Lal University wei kini kiwa lai puræ da dawa ki wow Suspend oo wei wow takit yeini da u High Court Judge uwa da chong-ngiah.
Ka sorkar da thung ko da ka Special Investigation Team (SIT) yow takit yeini hadien wa poor kani ka chithi wa da thoh cha u Modi ha ki rynsan Social Media heiwa da pynbaad kini ki kynthai wa da chim kabu u ki boon sngi deiwa phah wan cha ka kamra krehkaam yong oo.
Kani toh ka sien wa soo wa da chah thoh kam kani ka chithit pyrchah ya uni u Professor uwa da lait la ar sien khlem chah pynchitom hadien wa da takit da kani ka University yeiwa da chah pynbaad u.
Ka Deepti Garg kawa man kam ka ASP da ong ko wa daw Register yaka FIR hadien wa sdang yei takit tangwa da ong ko wa hawa yachem ki pulit wa uni u Professor da ong bait u wa ini toh i leh Politics donhi. Wei da ong u leh wa man u uwa da pynkhreh ya iwon iwon i takit pyrchah ya oo.
I chah pynbaad u toh wa manda khut u ya kini ki kynthai kawi hadien kawi, da phah u leh wow psiah cha paikhana wa em ha kamra kreh u wei heini da sdang u wa tba khlem akor ki wei manda pyrchah ki, da maham u ki.
Kini ki kynthai da pynbaad ki leh wa da pyndooh u ya waroh ki sabut deilang wa iwa da riñ da ki CCTV hapoh kamra u.
Kamtæ da ong ki wym em de chaniah ki ya kani ka skurbah wei da dawa ki yei hok yong ki kamjooh wow thung noh da uwi won u Professor heithaw yong uni.
Discussion about this post