Jowai: U Marki Mulieh U MDC ka JHADC uwa mihkhmat ya ka Jowai North Constituency da thoh u cha u montri ka chait ka khiah u AL Hek heiyatoh wa tlot ki thaw sumaar hapoh ka Constituency yong oo.
U Marki da ong u wa kiwa chitom kiwa thooh dawai na Jowai Civil Hospital, Ialong boon uiñ ki deiwa dooh mynsien neibhah ym yoh ki ya i sumaar wa biang wei da hap lai ki cha kiwi ki Hospital.
Da ong u leh wa manda lai u dei yong samen u da chem u wa ini waroh man i iwa sakhiat neibhah wa duna ki Doctor kamjooh ki Specialist Doctor wow chakri ya ki paidbah.
Da kam u leh wa ha ka Civil Hospital em ko du ar ngut donhi ki Doctor Specialist hawa emkaam hadooh 17 ngut kam ha kani ka thaw sumaar wa em haddooh 100 tylli ki thaw thiah kiwa chitom wa kjut wei ini man ko pyrchah ya ki kyndon wa da booh da ka Medical Council of India.
Heijooh i por leh da ong u wa boon ki kaam wa lait kiwa ym pu em thap wa kreh wei kiwa lait toh em kiwa da ku krdan wa kiwa da chah kyrriah kaam kamjooh kiwa da ieh yei kaam yong ki.
Da e nongmuna u leh wa kam ha ka chnat Surgery Department hadien wa u Dr. Syiemlieh da ieh ya ini i kaam hadooh katni ym em de wa wan wow pynpdap wei ini i jooh ha ka chnat Gynecology hadien wa mih ka Dr. L. Challam wa yoh ya ka pynku kyrdan, i kaam yong ka man i iwa thylli.
Ha ka chnat Anesthesia da em Doctor uwi donhi, u Dr. B. Syngkon hadien wa Dr. M. Surong da chah kyrriah wei ym em won pyndap ka sorkar ya iwa lait kaam.
Heiyatoh won wa kiwi ki kyndon wa da booh ka Medical Council of India heiyatoh wa ki Hospital, PHC, CHC, Health Centre wa kiwi toh u bood ya ki kyndon wei lada kamni ka kaam ka tnat ka chiat ka khiah man ko kawa sepai wei ha waroh ki tnat sumaar emkaam ki ar ngut ki Specialist Doctor.
Kamtæ u Marki da kyntu u ya u montri ka chait ka khiah wow bood u ya ki kyndon ka Medical Council of India wow pyndaap ya ki kaam wa lait yow ye u e ya ka chakri wa biang cha ki paidbah.
Discussion about this post