Ka Synjuk Ki Waheh Chnong Jowai ynne ka sngi da pynman ko yei thung dieñ ha yung krehkaam u District Transport Officer, West Jaintia Hills kam chibynta i kynmoo warom ya ka World Environment Day kawa daw man ha ka 5 tarik uni u bnai.
Ha ka yalang yahkhmat hei pynlai u Embhah Lyngdoh, Vice-President ka synjuk, da emlang leh u Riquoma Rq. Laloo, General Secretary ka synjuk wei da yoh leh i klam i kappæ wa kyrpang chaphang i emkaam wow thung dieñ wei wow yada ya ka Bei Ramaw iwa da khana da batai da u Lamphrang Pohktai, Executive Member ka synjuk, u B. Japang, ACF-Social Forestry, Jowai Division, West Jaiñtia Hills District kamjooh na u Eborlang Lyngdoh, District Transport Officer, West Jaiñtia Hills wa man kam u kongsan.
U Eborlang Lyngdoh hei e kyntien kam u kongsan, da khana u yei ye kiwa chong chnong ka ri Bhutan wow burom u kheiñkor ya ka bei ramaw wa ki soodong sookun yong ka khamtam i ye yong ki wow pynneh pynsah yei man khooid man kyntang ka wah wa em hapyrdi chnong.
Kamtæ kyrsu kyntu u wa i jooh leh ha ka chnong Jowai wa em ka Wah Myntdu kawa psa umbaam umdih ya kiwa chong chnong wei emkaam u thoohlaad i ha kani ka juk ka por kammon u leh yow ye u pynneh pynsah yei man khooid, kyntang yong ka kamjooh leh ya kiwi ki bynta kiwa yatoh wei man i long ka ramaw.
Khaddooh da pynkut ya kani ka yalang da ki kyntien kitbok kitrwiang na u D.H.Pde, Treasurer ka synjuk wei pynbood won da i thung ya ki tre dieñ dei chimbynta ki dkhot ka synjuk.
Discussion about this post