Ka Meghalaya Pradesh Congress Committee (MPCC) ha ka 14 tarik da pynman ko ya ka yalang wow pynskem ya kiwa kitkaam yong ki District Congress Committee.
Ya kini kiwa kitkaam da thung bait da ka All India Congress Committee (AICC) heiwa da thung biang ya u Vincent H Pala kam u President ka MPCC.
Ka AICC da thung ko leh ya u MDC ka Saphai Sahsngiang, u Rikut Pareiñ kam u President ka West Jaiñtia District Congress Committee (WJDCC).
U Rikut hei klam ha kani ka sngi da e khublei u ya ka MPCC kamjooh i sñiawngooh ya ka AICC na nongbah Delhi wa da yoo biang ko wow thung ya oo kam u District President.
Da kyrmen skem u wa dei yakrehlang nadooh ki khian hadooh ki heh, daw ye u pynku biang ya ka Party kam ki snem wa dadep katkam i angnood ki paidbah.
Chooh chooh da ong u wa ka Congress toh ka Party toh ka yong ki paidbah wei man ko kawa laitlooid hajrong wow yakhun ya ki yurim wa skem neibynta i bha i miat ki paidbah.
Heijooh i por da sñiawskem u leh deiwa ong wa kam u khlieh ka Congress ha West Jaiñtia Hills daw yakhun u yei hok ki paidbah ym du hapoh ka District tangwa wot yong ka jylla leh waroh kawi.
Discussion about this post