Ka Meghalaya Pradesh Congress Committee (MPCC) da thung ko ya kawi ka Committee wa kyrpang wow khlieh da u President ka MPCC, wow pyrkhat kammon u leh ya ki 5 ngut ki MLA wa ka seiñ da beh ko chipor (Suspend), neidaw wa lai kyrchaan ki ya ka sorkar Meghalaya Democratic Alliance (MDA) wa khlieh da ka NPP.
U heh ka Congress uwa man leh u MDC ka Mawhati, u Charles Marngar da ong u wa kani ka Committee daw pyrkhat ko wow chim ya ka rai kammon wow leh ya ki 5 ngut ki MLA ha ki kajiak sngi wow wan.
Neiliang u Working President, u Pynshngain N Syiem da ong u wa ym em u booh por ya ki 5 ngut ki MLA wow jubab ya i phah pynche (Show Cause Notice) yong ka Party, wei ye ki u chim ya i por deiwa yasyllok wa kiwa kyrchaan ha ki Block, hanla ymye ki wow emlang ha ki kaam ka Party.
Hawa kylli, da ong u wa hadooh katni ympu ye u ong iwon iwon hajrong i beh seiñ ya ki tangwa u President wa ka Committee wa kyrpang daw rai ki hadien wa da bichaar lang ki yeini.
Da ong u wa ka Congress ym kwah ko wow leh jhan ha iwon iwon i rai neibhah hap burom ko leh ya kiwa kyrchaan wa kiwa kreh ka Party.
