Ka Synjuk Rangbah Shnong Border Area hapoh ka Raid Nongtung, Ri-Bhoi yong ka Hima Khyrim ryngkat u MDC ka Mawhati ynne ka sngi da yachem ki ya u Chief Executive Member ka Khasi Hills Autonomous District Council, u Titosstarwell Chyne wow tuklar neibynta wow pynyoh noh ya ki Border Outpost ha ki chnong wa da pynkhreh da ka synjuk.
Hawa yaklam wa kiwa pathai khubor, u President ka synjuk, u Blikstar Sohtun da ong u wa ka synjuk kwah ko wa ka sorkar u booh bait ko yaka Border Outpost ha khappood ym ha ki chnong wa haap hapoh Meghalaya, da ong u leh wa neiliang ka chnong daw e sñiawbha ko ya i thaw ha chnong Ummat wa Umtlieh.
Chwa wow yachem ya u CEM, kani ka synjuk da lai booh ko leh yei dawa hakhmat u Montri Rangbah ka jylla, u Conrad K Sangma hei step wei ini i booh dorkhat toh hadien wa ka Dhab ki Montri (Cabinet) yong ka jylla da rai ki wow booh ya 2 tylli ki BOP ha ka thaaiñ Block II, Ri-Bhoi District, heiwa da phah leh wow pait ya i thaw wei wow yachem wa kiwa yahkhmat ka chnong.
Da ong u wa hawa yachem ya u Montri Rangbah ka jylla, u Conrad Sangma da pynsñiaw u yei tieñ wow booh ya ka BOP chadooh khappood ya boi thut i klam pynbait pood deiwa kyntu leh wow chah bait wow em hapoh ka Meghalaya. Ki thaw wa ka sorkar thmu ko wow booh ya ki BOP toh ha ka chnong Tyrso wa Thadrang ya kiwa ka synjuk da pyrchah ko.
U Sohtun da ong u wa neibynta i chngaaiñ ki 22 tylli ki chnong ha kani ka thaaiñ wa em ha khappood da toh wow booh ya ki pyn ha u pood. Da ong u wa ka sorkar Assam da booh ko hadooh 5 tylli ki Outpost nadooh u snem 1994, katwa ka sorkar Meghalaya won ym nood ko u booh ya ka ktem ki pulit iwa da pynartatien ya i mon ka sorkar jylla.
Heiyatoh wa i yachem u CEM ka KHADC, u heh ka synjuk da ong u wa neidaw wa ka KHADC pait ko yei khyndaw i chyiap kamtæ da lai yachem ya u CEM wow kyntu u yaka sorkar jylla wow ap yeiwa dawa ka synjuk, deiwa pyntip leh wa neiliang u CEM da chimkhia u ya ini wei daw yaklam u leh wa ka sorkar.
