Tieñsar ki MDC ka UDF wa da sdang knieh ka sorkar jylla ya i hok ki District Council

Ki MDC ka United Democratic Forum (UDF) kawa em ha ka liang pyrchah ha Khasi Hills Autonomous District Council (KHADC), da phylla ki yei rai jong ka sorkar wow pynkrehkaam noh cha ka chnat Public Health Engineering (PHE) ya ka ‘Tied Grant’ yong ka 15th Finance Commission wa da mang cha ki Autonomous District Council (ADC) ka jylla kawa T. 45.5 klur.

Hawa yaklam wa kiwa pathai khubor, u Chairman ka UDF, u Pynshngaiñ N Syiem da ong u wa ka liang pyrchah da dep paan pynche ko na u Chief Executive Member (CEM) ka KHADC, u Titosstarwell Chyne uwa da kular wow chimkhia wow yaklam yeini wa ka sorkar jylla.

Da ong u wa katkam ka chithi wa da yoh, ka sorkar jylla da chim ko yeini i rai ha ka 15 Naichiphaw 2020 wei ya ini i rai da pyntip leh cha u Secretary ka Executive Committee ka KHADC ha ka 18 Khonchonglad 2020.

Katkam wa ong u Pynshngaiñ, ka Ministry of Finance ka sorkar pyrdi lyngba ka 15th Finance Commission da pynlait ko ya ka song poisa cha ki ADC T. 182 klur neibynta u snem 2020-21, wei ha ka bhah wa nyngkong da pynlait T. 91 klur wa kynthup ya ka ‘Untied Grant’ wa ka ‘Tied Grant’ kawa man mar T. 45.5 klur, tangwa phylla won wa ya ka ‘Tied Grant’ hadooh katni ympu pynlait ya ka, wei da yoh yutip wa ka Special Committee yong ka sorkar jylla wa ya kani ka poisa wa toh neibynta i khooid i jngiar wa ka um daw pynkrehlaam noh da ka chnat PHE yong ka sorkar.

Related posts

Khlaad noh ka Kong Nitaboris Biam

November 9, 2024

Sñiawkhia u Andrew Shullai ya i tlot i rukom pynmih poisa ka JHADC

November 7, 2024

U Pynshngaiñ da ong u wa katkam ki kyndon, ya kani ka poisa da toh u pynlait cha ki Excluded Area wei lada pynslem hadien 10 sngi haap su wa ka sut, wei lada kheiñ ya i pynslem kamwa man katni la 6 bnai, ka sut ka da kynjoh ko cha kamwa T. 2 klur.

Da ong u leh wa man iwa sñiawsih wa ka sorkar ym pu em puræ bha ko ya ki kyndon, wei neiliang ki MDC da dawa ki na ka sorkar wa toh u pynlait noh wut-wut ya kani ryngkat wa ka sut.

Neiliang ki MDC ka UDF da ong ki wa ini i leh ka sorkar jylla deiwa knieh noh ya i bhah ki ADC toh i wym kheiñkor de ya ka Council deiwa knieh ya i hok yong ka.

Heijooh i por da pynsñiaw u yei tieñsar ya samboi wer pa wer ki kaam ka Council daw chah knieh noh ki ha ka sorkar iwa ye u wanrah yei maa ya ka jaitbru.