Jowai: U National President ka National People’s Party (NPP) uwa man leh u montri rangbah ka jylla, u Conrad K. Sangma ynne da lai yalap u neibynta Martin Danggo ha ka Rally ha Ranikor, South West Khasi Hills.
Ha kani ka Rally da em palat 3000 ngut ki paidbah wa wan sakhi na ki jaitbru waphær waphær wei da em leh i pynyoo leh ya ki chaad wa ha rukom iwa da pynchongchit chooh chooh ya ki paidbah.
Hawa e i klam ha kani ka sngi, u Conrad da ong u wa u pa yong oo u P. A. Sangma maya bha u ya ki paidbah ka Ranikor Constituency neibhah da jooh ong u wa lada em i ka laad emkaam wow leh i iyi iyi ya ki paidbah khamtam ki paidbah ka thaaiñ Ranikor.
U Martin Danggo uwa chonglang wa ki paidbah hei emlang u montri ka tnat C&RD u Sniawbhalang Dhar, u State President ka party, u W.R. Kharlukhi, u State General Secretary u Babeth Sangma, wa kiwi kiwi.
Hawa e yaroh ya u Martin Danggo, uwa da mih na ka Congress wow yakhun biang ha kani ka By-election, u Conrad da ong u, “Oo (Danggo) da ieh u yei kaam yong oo neibynta ki paidbah ka Ranikor Constituency neibhah ym em ieh u yei kaam MLA wow myntoi samen neibhah wa oo em u i sñiaw ya ki paidbah wei kwah u wow pyndap yei angnood ki paidbah.”
Da kyntu u leh ya ki paidbah wow jied biang ya u Martin Danggo wei wow pyntikna wa daw jop boon bha u ha kani ka kynti.
Heijooh i por da beiñ joor u ya u montri rangbah warim ka jylla, u Dr. Mukul Sangma wa da pynemkaam bakla u ya ka poisa wa wan na ka sorkar pyrdi iwa da wanrah yei thkoh i rukom poi ki kaam pynroi hapoh ka jylla.
“Haap pynkylla i yeini khnang wow yoh myntoi ki paidbah neibhah wa ka NPP em ko ha ka sorkar, wei tikna O wa ki paidbah ka Ranikor daw jied ki ya ka NPP wei wow jied biang ya u Martin Danggo wow mihkhmat u ya ki,” da ong u Conrad.
Discussion about this post