Ynne ka sngi kiwa yahkhmat ka Dorbar Ki Waheh Kur Ri Jaiñtia wa kynthup ya u President, u Khroo L. Pariat, u Vice President, u D Donstan Khonglah, u General Secretary, u Gremlin Bareh, ki Asst. General Secretary, u Jesper Bareh, u Heimonmi Tyngkan, u Publicity Secretary, u Standbyme Sari wa kiwi da lai li pynkynmoo biang ki yaka Jaiñtia Hills Autonomous District Council heiyatoh i dawa wow tipmit smat noh da ka aiñ ka Council ya ki Kur waphær waphær kamjooh ki Waheh Kur, ki Dorbar Kur wa em hapoh u pood u ang ka JHADC, najrong wow e bor ya ki Waheh Kur yow pyntikna ki yei chim kur chim jait ya kiwa paan Schedule Tribe khamtam kiwa toh na i jait i kynja ka Bei.
Heijooh i por kyntu ki wa toh u booh ryntih leh haka kot aiñ yong ka council ya waroh ki jait Kur, ki Dorbar Kur.
Kini kiwa yahkhmat ka Dorbar ki Waheh Kur Ri Jaiñtia da kyntu ki leh yaka Executive Committee ka JHADC wa hadien wa da munjur, wow sñiawbha ki u pyntip cha ka yung krehkaam u Deputy Commissioner ka East wa West Jaiñtia Hills, khnang yow man iwa suk iwa bait ki rukom krehkaam ka sorkar neibynta u e Schedule Tribe Certificate cha kiwa toh hok u yoh.
Da kyrpaad ki wa katwa ye wa lah hapoh chi bnai toh u pynmih noh ka pynbna namo ka Notification næ i tipmit dei wow khut ya waroh ki Kur hapoh Ri-loom Jaiñtia u wan Register noh ki ya ki Kur yong ki, wei ki wym pu em Dorbar Kur, Seiñ Kur leh u sdang noh ki wow jied ya ki Waheh Kur yong ki.
Neitæ ong ki leh wa toh u pyndooh noh yei kyntien “Synteng” kam kawi na ki jaitbru, u pyndooh leh ya ki Kuki, Zo, Hmar wa kiwi ki jait bru wym toh na Meghalaya kiwa em pyrtuid ha ka ST Order 1950, deiwa pynrap leh wa ki jaitbru Kuki, Zo wym em ki ha ka Jaiñtia lait noh ki jaitbru Biate wa em ha Saipung wa da tipmit hi daka JHADC.
Discussion about this post