U Montri Khynnah ka sorkar India wa pait ya ka chnat aiñ (Law and Justice), u Prof. Satya Pal Singh Baghel da ong u wa toh i kaamram yong ka imlang sahlang wow pynlait ya ki khynnah na ki kaam wym man, heiwa da ong u leh wa emkaam wow e yei stat i tip iwa bha ya ki khynnah wow pynlait na ki lok kiwa sih hajrong i man i long yong ka yung ka sem, neibhah kini toh ki daw wa yah ya ki khynnah cha ki kaam wa sih.
U Baghel uwa da wan ynne ka sngi cha nongbah Shillong da lai pait u leh ya i thaw ri khynnah wa dang khian rta, wei da khana u wa em 17 ngut ki khynnah kiwa chah kset.
Hawa klam wa kiwa pathai khubor, da ong u wa ha kiwi ki jylla ka ri India boon bha ki Case wa yatoh wa ki kaam wa man pyrchah ya ki khynnah namo wa haap hapoh ka aiñ POCSO, tangwa kamwa man katni ha Meghalaya ki kaam pyrchah aiñ da kiwa dang khynnah dang duna bha i.
U Montri Khynnah ynne ka sngi da khut u leh ya ka yalang wa ki sahep ki chnat ka jylla wa na ka Meghalaya State Legal Services Authority, heiyatoh wa i pynkrehkaam ya ki Scheme ka sorkar pyrdi neibynta wow chna ya ki yung bichaar kiwa khian.
U Baghel da pyntip u wa em palat T. 700 klur i pynlut ka sorkar pyrdi neibynta wow chna ya iwa emkaam ki yung bichaar wa khian khamtam neibynta wow pynsmat ya ki mukotduma POCSO, wei da ong u wa hadooh katni i pynkreh ya ki kaam da man iwa biang.
Da pyntip u leh wa em ki kaam wa dang sahteiñ heiwa neiliang ka jylla da paan yarap poisa chooh chooh ko na ka sorkar pyrdi.
