Uwa yahkhmat ka liang pyrshah ha ka jylla, u Dr. Mukul Sangma da ong u wa ka sorkar toh u ujor ko katkam ki kyndon yong ka aiñ pyrchah ya kiwa pyndooh nong ya ka sorkar jylla na i khayi mooyong pyrchah yaka aiñ.
Da ong u wa daw yang yei jubab yong ka sorkar wa e ko cha ka Lokayukta wei hajrong ini daw klam won u. Da ong u leh wa katkam i thoh wa da pynyoo ha kawi ka thaw wa em 1.41 Lak Metric Ton u mooyong, wei hajrong ini da phah takit ha u DC wa toh u pait, wei ka hukum da mih wow tahkit wei wow thaw ya u mooyong wa u mooyong toh em u katkam wa da pyntip da kiwa chong chnong, tangwa hadien kattu katni bnai wa lai pait u, u mooyong ym em u kamwa da booh hei thoh.
U Dr. Mukul da ong u wa kammon u mooyong wiar u, deiwa pynrap wa ini i wiar mut wa kit pyrchah aiñ deiwa tip lang ki bru wa em ha i bor wei lada ym em ka takit kawa bniah ym ye wow chem ya iwa sakhiat, iwa mut wa em kiwa e laad wow khayi tooh ya u mooyong yow pyndooh nong ya ka sorkar jylla wei ini pynyoo bait ko wa em i baam-tooh wei ka sorkar toh u ujor ko katkam ki kyndon aiñ.
Da ong u leh katwon da dooh nong na i kit pyrchah aiñ ya u mooyong wei kiyi kiwa emkti, wei ini toh iwa da soohbuit bha wei i buit toh wow lute na ka jylla, deiwa pynrap wa ka sorkar toh u yaleh ko wow yoh biang ya iyi wa dooh nong, wei wow kdong ya ki bru wa emkti yow pynchitom katkam ka aiñ MMDR Act.
Uwa yalam ka Congress da ong u wa kam ini i jia da em man-ka-sngi, tangwa kamwa da yoo wa hajrong ini i kaam da pynkohngoh wot yaka sorkar India yow yoh yei jubab wow yada ya ki ha ka Parliament.
