Ka War Jaiñtia Students Union (WJSU) ynne ka sngi da lai booh ujor ko ha Sub-Divisional Officer (Civil) ka Amlarem, West Jaiñtia Hills District hajrong i yohlaad ki bru na Bangladesh u wan psiah kulmar cha ri India lyngba ka Dawki wa kiwi de ki thaw khappood yong ka thaaiñ War Jaiñtia.
Ka seiñ da ong ko wa ka thaaiñ Amlarem Civil Sub-Division toh kawa em u pood wa jrong bha wa ka ri Bangladesh. Kamtæ kiwa chong chnong, kiwa yahkhmat chnong wa ki dorbar chnong jooh yoo ki boonsien ya ki bru wa wan psiah pyrchah aiñ yow kreh mylla wei em leh kiwa em i thmu psiah cha kiwi won ki bynta ka jylla.
Da ong ki wa du hapoh uni u bnai yong uni u snem i psiah pyrchah aiñ da man kawa joor bha, wei dang ini wa dep ki pulit ka jylla da yoh kem ki hadooh 18 ngut ki Bangladeshi kiwa psiah da ki kynhun, heiwa da kem leh ya ki 8 ngut kiwa yah kari, ki tre kari wa 2 ngut kiwa man kam kiwa pynlai. Da yoh ksoh ki leh ya ki 27 ngut ki nong Bangladesh (16 ngut ki chynrang wa 11 ngut ki kynthai) kiwa lai pyrchah aiñ na ki bynta Zero Point dei thmu psiah tooh chapoh ka ri India.
Neitæ ki khynroo tre chnong da yoh ksoh ki ya ka kari kawa kit ya le ngut ki bru ki wym em ki kot ki sla wei hadien da khana ki wa ki toh ki Bangladeshi. Neitæ ong ki wa ki dalal kiwa khayi ka thaaiñ hi wa tyrwa poisa yow pynlait ya ki.
Waroh ini i jia pynyoo wa kiwa yah kari, kiwa khayi wa kiwa pynlai na ka thaaiñ da yarap ki yeini i kaam pynpsiah pyrchah aiñ, wot ya ki sarok yong kani ka thaaiñ War Jaiñtia da pynemkam kam ka luti u pynlai cha kiwi won ki bynta yong ka jylla ya ki bru baar ri.
I yohlaad ki bru baar ri u psiah pyrchah aiñ khlem ka Passport, ka Visa næ ka Permit wa biang, toh ka kaam thok kaam chukor katkam ka Foreigners Act, 1946 wa ka Passport (Entry to India) Act, 1920, da ong ka seiñ WJSU.
Neitæ i yohlaad yong ki u wan chong chnong khlem biang ki kyndon wow pynrkhiñ booh ko hei maa iwa ye u ktah yei boon bru, yei khyndaw u chyiap wa ka riti dustur yong ki tre ri tre muluk Khasi-Jaiñtia kiwa haap hapoh ka Sixth Schedule.
Chooh chooh ka seiñ ong ko na ini ye u mih boon i eh i khoo hadien habood, nadooh i rukom im, i chakri paidbah, i mantre yei khyndaw u chyiap, wei na ini daw mih chooh chooh leh i wym chngaaiñ ha kiwa chong chnong ha ki thaw khappood.
Ka seiñ ong ko wa ka Meghalaya Residents Safety and Security Act, 2016 kawa da dawa u pynpsiah pyrtuid ya ki wym toh tre chnong wei wow pynkrehkaam ya kani ka aiñ deiwa che toh kawa biang bha.
Hajrong ini i yohlaad kiwa na Bangladesh u psiah pyrchah aiñ, da kyntu ya ki bor pulit wa ki bor wa toh u pait yow pood wow pynjoor ki kaam ha lynter ka Dawki wa waroh ki thaw khappood ha ka thaaiñ War Jaiñtia.
Heijooh i por toh u pynsakhiat ya kiwa mylla wa kiwa chong-wai ki wym toh tre chnong hapoh ka Sub-Division wei wow pyntikna yei pynpsiah pyrtuid katkam ka Meghalaya Residents Safety and Security Act, 2016.
Da kyntu ya waroh nadooh kiwa pynkrehkaam, ki Contractor, ki tre thaw wa ki tre Hotel/Lodge wow booh bait ryntih dei thoh khamtam ya ki wym toh ki tre chnong wei wow pynmih yei sakhiat katkam i dawa.
La toh iwa daw pynchitom leh toh u chim ki laad wa khor pyrchah ya ki Agent, kiwa khayi wa kiwa chong chnong kiwa yarap ya kiwa wan psiah pyrchah aiñ chapoh ka jylla.
Neiliang ka seiñ smat ko u yakrehlang wa ki paidbah wa chong chnong kamjooh wa ki bor sorkar yow khanglaad yei wan psiah kulmar ki bru wa na Bangladesh.
Ka seiñ da klam che ko wa lada ki bor wa toh u pait ym leh ki iyi iyi ya kini ki mat dawa wa emkaam, ka War Jaiñtia Student’s Union daw chim ko ya ki laad ki luti wow leh da ka hi neibynta i myntoi yong ki paidbah wa i chngaaiñ ka khyndaw u chyiap yong ki tre ri tre muluk.
Ya kani ka ujor da phah leh cha u Home Minister, u MLA ka thaañ, cha u DC wa u SP ka West Jaiñtia Hills deilang u Commandant ka BSF wa cha waroh ki waheh chnong.
Ka kyrwoh na u Senior Vice President ka seiñ WJSU, u Autumn Sumer.
Discussion about this post