U MLA warim uwa man leh katni u Convenor ka yakhih Ïada La Ka Ri, u Ardent Miller Basaiawmoit da ong u wa i rai ka sorkar jylla wow booh yaka dan ha ki phniang kari da man ko iwa pyrchah yaki paidbah iwa da ktah ya ki bru paidbah kiwa dooh wa duk.
U Basaiawmoit da ong u leh kani ka dan phniang kari da ktah ko leh yei yoh i kot ka jylla wei ini i leh ka sorkar toh iwa khlem yurim.
“Ini won i rai wow pynduna ya ka dan phniang da T. 2 toh iwa da wan manda dær i por wei du wow pynbiej yaki paidbah,” da ong u Basaiawmoit.
Da ong u leh wa lada ka sorkar chimkhia ko yow pynstiñ yei yukit ki paidbah, da toh leh u chim ko ya ki kattu katni ki laad luti chwa wow chim ko yaki luti wa khor.
“Nyngkong toh u pynduna yei lutsan wa i pynlut yaka poisa paidbah deiwa pyndam ya waroh kiwa thung daka sorkar kiwa kynthup ya ki Chairman, Co-chairman, Vice Chairman ha kiwa boon ki Board wa ki Corporations kamjooh ya kiwa e buit namo ki Political Advisers,” da ong u Ardent.
Da ong u leh wa ka sorkar jylla toh u pyntikna ko wa ym em liat ki dan wa da lum ka sorkar.
“I wym ye ka sorkar wow khang yei kit tooh ya u mooyong da ktah bha ko yaka muna poisa ka jylla iwa da wanrah yei dooh nong wa joor,” da ong u.
Da ong u leh waka sorkar ym ye ko wow myllien u im deiwa leh khapnap iwa da wanrah leh i sepai ka poisa paidbah.
