Ynne ka sngi ka VPP da pynman ko ya ka yalang ha Iawmusiang, Jowai heiyatoh wa ka bhah kreh namo ka Reservation Policy waka Roster System.
Neiliang u Shanbor Dkhar da e u ya ki kyntien pdiang burom ya waroh kiwa da wan ha kani ka yalang.
Ha kani ka sngi da yoh ya i klam na u OR Challam heiwa da ong u wa ym jooh embynta u ha kawon kawon ka seiñ saiñ pyrthai wei ha ka Election wa dadep da kwah i yei kylla tangwa kat u yoo mar dei kangtleiñ heiwa da pynkreh ya ka Roster System.
Kamtæ deiwa burom ya ka Meghalaya High Court da ong ko wa ka Reservation toh ka mat ka sorkar jylla wei nadooh u 1972 da dawa ki Garo wei ha kani ka kynti da dawa ki ya ka Roster System.
Da ong u wa ki 36 ngut ki MLA ka Khasi-Jaiñtia emkaam wow booh ki ya ka jaitbru haphrang wow em i man salonsar ha ka Yung Dorbar deiwa kular wow em u chirup ha ini i yakhih neibynta na Reservation Policy.
Chooh chooh da ong u wa lada ka sorkar ym ap ko tæ daw pynman da i yakhih neibhah ki khynroo khyllood em ki chiboon kiwa da lai puræ pynchkhæh ha ki bynta wa har rukom.
Kamtæ da kyntu u ya ka sorkar u chna ko ya ka Committee hajrong ini i kaam wow pyndep ya i thooh bniah hajrong ka Reservation Policy wei toh u pynsangeh ya waroh i thung kreh ka sorkar wa katni.
