Ynne ka sngi u Montri ka chnat Arts & Culture ka jylla, u Sanbor Shullai da wan u cha Jowai wow pait ya ka District Library Auditorium kawa em ha Mynthong, chirup i emlang ka Synjuk Waheh Chnong Jowai, ka JSU, u Librarian, u W. Lamin wa kiwi kiwi.
Ya kani ka Auditorium da chna ha u snem 1987 heiwa da chah ieh ko khlem em wa wan pait ya ka na ka chnat.
Ini i wan pait u Montri ya kani ka Auditorium toh hadien wa yoh u ya ka ujor na ka Synjuk kamjooh leh na ka JSU wa emkaam wow chna pynmiat (Repair) ya ka neibhah wa da em boon ki bynta kani ka yung kiwa da oor, kiwa kaad wei kiwa da sih.
Hawa yaklam wa u Sanbor hadien wa yoo u yeini, da ong u wa waroh kani ka Auditorium da sih da pai lut ko heiwa da wanrah i yei tieñ ya ki paidbah wow pynemkaam ya ka.
Da ong u wa hadien wa yoo yei man i long ini i yung da e yumut noh wow sliah noh ya ini i yung weiwa u chna deiwa thymme heiwa daw e kti ha ka Technical Wing ka BJP na Delhi kiwa man laitlooid wow pynwandur ya kani ka yung khlem su iwon iwon cha ki.
Chooh chooh da ong u wa da e yumut u wow sdang ya ka Monitoring Committee hapyrdi ka Synjuk wa ka JSU wow pait ki yei kreh ya ka Auditorium khnang wa i kreh u man i iwa paka khnang wow lait nei baam-tooh ya ka poisa.
Heipor wa sylli ya kani ka yung, da ong u wa kamwa man katni ka Auditorium em ko G Plus One namo ar mala tangwa katkam ka Building Bylaw daw ye wow chna G Plus Five namo ynru mala khnang wow ye u pynemkaam ya ka ha kiwa boon ki rukom, nadooh i thaw pynyieñ kari, ki dukan, ki Lift, ka Auditorium wa kiwi kiwi kiwa ye wow pynmiat wei wow yoh kreh ki khynroo khyllood.
Heiyatoh wa i kreh wow chna pynmiat (Repair) wa dang lai ha kani ka Auditorium, da ong u wa kopsar i kreh da sdang i hadien wa tip wa daw wan u cha kani ka thaw wow pynhun ya oo tangwa oo samen ym em u kmen u yeini.
Da pyntip u leh wa ya ka poisa wa daw chna thymme ya kani ka yung daw thooh naka sorkar pyrdi.
Ha kani ka sngi da lai pait u leh ya ka District Museum, West Jaiñtia Hills heiwa da pynsñiaw u yei mynsien wa khia wow yoo wa da chah iehbeiñ ko deiwa ong leh kamwa daw chna ya ka Auditorium da kawa thymme emkaam wow leh i jooh ya ka Museum.
