Uwa e ktien ka All India Congress Committee (AICC) uwa man leh u MP na Assam, u Gaurav Gogoi da ong u wa u Montri Rangbah ka Assam, u Himanta Biswa Sarma toh uwa kwah bait wow mih ha ki laad pathai khubor wei lada ym mih tæ lynga u, wei teiñ teiñ da kroh pynbiej u ya ki Montri Rangbah yong ki jylla wa marjan wow yasoi ya kayi kayi wym kwah ki du wow pynyoo wa kam u Chairman ka NEDA da ye u wow leh iyi iyi.
Ini I klam u Gogoi toh hajrong i kylli yei yasoi soskular ka sorkar Assam waka sorkar Meghalaya yow pynbait pood ki ar jylla ha ka bhah wa nyngkong. U Gaurav da ong u wa ym pyntikna wa hajrong wa da soi ya ka soskular Memorandum of Understanding (MoU) da leh u næ ym em kamwa toh u leh, tangwa kamwa da jooh yoo hi man-i-por da leh u kamni du wow yoh u u mih khubor.
Uwa yahkhmat ka Congress da ong u wa ki Montri Rangbah yong kiwi ki jylla toh u man ki kiwa skem ha ka yurim neibynta ka jylla wei ki bru yong ki ym toh u chah pynbiej ki ha kitu kiwa chong ha Dispur lane ha Delhi.
U Gogoi da ong chooh chooh u wa ya u pood u ang ym ye wow chim tre da ki ar ngut ki Montri Rangbah deiwa chong ha kawi ka kamra, neibhah kani toh ka kaam wa ktah ya kiwa chong chnong ha khappood.
Hawa yatoh wa i pynbait pood hapyrdi ki ar jylla, neiliang u President ka MPCC, u Vincent H Pala da ong wa i chna ya ki Regional Committee neibynta wow pynbait pood toh wow pynmyntoi wa toh bait hapyrdi ki Politician, neibhah kam kini ki Regional Committee ym ye ki wow sñiawthooh ya ka tynre wa i kwah yong ki paidbah, wei ka Report leh ym em pynyoo paidbah tangwa da e kti du ha ka sorkar.
Neiliang u Pala da ong u leh wa ka Congress ka kwah ko wow pynbait ya u pood u ang deiwa thung ya ka Boundary Commission, neibhah lyngba ka Commission daw ye wow poi cha ki chnong ha khappood wow yachem wa kiwa yahkhmat chnong wa ki khlieh synchaar hachwa wow chim ya ka rai kammon wow pynbait. Da ong u wa toh i kaam wa hap leh hadooh 3-4 snem ym du hapoh 3-4 bnai.
