Hadien wa chah tooh 12 tylli ki tiar yasiat na ka 20 Madras Regiment wa em ha Secunderabad Cantonment ha ka 30 tarik u bnai wa dep, da yoh wow kem ya uwi u bru hadien 11 sngi da ki pulit ka Malkajgiri PS ka Hyderabad uwa man kam u Havaldar uwa da chong ngiah ar bnai nachwa.
Uni u bru toh uwa tip kam u Upputholla Mallesh wei da chong ngiah u na ka 20 Battalion ha ka 30 tarik u June.
Ki pulit hei takit da chem ki wa u Mallesh da psiah u cha kani ka Regiment lyngba ka Kargil Gate heipor 11 waje i miet ka 30 tarik u August wei da tooh u ki tiar yasiat deilang ki kuli heiwa nyngkong da kit u ki da ka Scooter wei hadien da thap u ki ha ka kari u.
Ki pulit da chemdien ki wa uni u bru ha ka 27, 28 wa 29 tarik u August da poi u cha kani ka thaw yow pait yei rukom lai rukom wan ki chipai wa em ha kani ka thaw yow pynkhreh u lai tooh.
Ki tiar yasiat wa da yoh u wow tooh toh soo tylli ki 7.62×39 mm AK-203 Assault Rifle deilang wa san tylli ki Magazine ki, kawi ka 5.56 mm INSAS 1B1 Rifle wa le tylli ki Magazine ko, 6 tylli ki 9 mm Auto 1A Pistol wa 12 tylli ki Magazine ki wa kawi ka 6.35-bore Civilian Pistol wa uwi u Magazine.
Ya kini ki tiar yasiat da chem na Kowkoor, Yapral wa Achampet ka Nagarkurnool District.
I thooh ya uni u bru da chem chitom neidaw wym em krehkaam ki CCTV ha kani ka thaw neidaw wa iñ kani ka thaw ha ki sngi chwa wei heipor wa chah tooh won ym em bordiñ.
U Mallesh da hap u wow chong ngiah noh nei kaam neidaw wym em chait u kamjooh wym em miat i rukom man u kam u chipai hadien 16 snem wei da psiah u cha ka Indian Army ha u snem 2010.
Ki pulit nyngkong da hap takit ki ya 100 ngut ki bru kiwa ye u psiah cha ka thaw booh tiar yasiat wei da suba ya ki ar ngut kam kiwa emkti tangwa hadien da chem wym emkti ki. Kamtæ da suba wa du ki bru wa tip ya kini ki kaam kiwa ye u leh yeini wei da sdang wow pait leh ya ki bru wa dang dep chong ngiah hadooh wa poi i suba ya u Mallesh.
Discussion about this post