Ka National Council of Educational Research & Training (NCERT) da tyrwa ko wow kylliang noh yei pyrtuid ‘India’ cha ‘Bharat’ ha waroh ki kot skur wei yeini da tyrwa toh da ki dkhot ka Panel ka NCERT.
Neiliang u Director ka NCERT da ong u wa da phah kani ka Panel ya ka Report yong ka la kattu katni bnai wei ym pu em pdiang yeini wa da tyrwa da kani ka Panel.
Kani ka ‘Panel on Social Sciences’ wa da thung da ka NCERT em ko 7 ngut ki dkhot hapoh ka High Level Committee wei da mynjur ki waroh wow tyrwa wa ha ki Subject Social Science wow kylliang noh dei ‘Bharat’ heithaw ‘India’.
U Chairperson kani ka Committee, u CI Issac uwa man kam u Historian da ong u wa i kyntien India toh iwa da pynemkaam hadien wa wan ka East India Company hadien ka thma Plassey ha u snem 1757 wei heijooh i por da ong u wa yei kyntien India da pynemkaam leh nadooh 5000 snem nachwa.
Hapoh ka Article 1(1) ka Constitution ka ri India da ong, “India, that is Bharat, shall be a Union of States”.
Ini da sdang i wow mih khubor khamtam hadien wa ka liang pyrchah da e pyrtuid ko ya idæ I.N.D.I.A (Indian National Developmental Inclusive Alliance) hapoh Parliament heiwa ka sorkar da pynemkaam noh ko yei pyrtuid Bharat heiwa ya ka President da thoh ya ka kam ka President of Bharat heipor wa pynman ya ka G20 hapoh ka ri ini wa dep kamjooh leh ya u Prime Minister kam u Prime Minister of Bharat.
U Issac da ong u leh wa kani ka Panel da tyrwa ko leh wow sdang da ka Indian Knowledge System (IKS) wei wow pynkylla leh yei rukom khana ya ka History kamwa da yah ki British kiwa da yabhah hapoh ka Ancient, Medieval wa Modern heiwa da ong wa ka India toh ka ri kawa dang doom dang sahdien ka wym em i stat i tip iwa man iwa bakla wei da toh wow wanrah noh da ka ‘Classical History’.
Neiliang kawa yahkhmat ka Congress ka Priyank Kharge da ong wa ileh syndet syndet da kynchiñ yei pyrtuid India.
Discussion about this post