Tylli ki seiñ ri-loom wow kyrchaan ya u Clement G. Momin kam u kyrtong ka NPP na Ampati

Ampati: Ki Party ri-loom na Meghalaya kam ka HSPDP wa ka PDF da lai yalap ki neibynta u kyrtong ka NPP, u Clement G. Momin ha ka yalang wa man ha Sapthoka, Chondonpara wa Joyfur yow pynyoo wa waroh ki seiñ ri-loom yatylli ki hapoh i yahkhmat u Conrad K. Sangma.

“I da sdang i ka luti wow wanrah ya ki kaam pynroi hapoh i yahkhmat u Conrad K. Sangma wei waroh i kwah i u ong ya ki paidbah ka Ampati Constituency toh wow pdiang ki yei kylla, wei ymtoh u chah yalam bakla ki ha ka Congress wa ki seiñ ri-loom daw kyrchaan ki ya ka (Congress). Ieh yn khana O wa neiliang ka PDF man ko kawa yatylli ki wei kyrchaan ko ya ka NPP,” da ong u Banteidor Lyngdoh ha chnong Joyfur.

Ki seiñ ri loom, wa ki MLA samen kiwa emlang wa ka Meghalaya Democratic Alliance (MDA) da ong ki wa yatylli ki wei da e ki i kyrchaan wa pura ya u Clement G. Momin. Da pynksan ki leh wa ka MDA daw neh ko hadooh wa kut i por yong ka wei ymtoh u artatien yeini.

“Ka sorkar MDA man ko kawa khlan wei kawa skem” da ong u Banteidor.

Related posts

Pynkhreh ka BJP Meghalaya ya ka Election 2028 deiwa pynskem ya kiwa kitkaam thymme

June 14, 2025

Kyntait ka Agatha Sangma wow man ka kyrtong MP cha Rajya Sabha

May 29, 2025

“I waroh man i kiwa yatylli wei waroh em i 37 ngut ki MLA wei ka Congress haap chong ko ha ka liang pyrchah katwa kamtæ ym emkaam u kyrchaan ya ka Congress,” da ong u Lambor Malgniang, u MLA samen uwa man leh u Chairman yong ka Meghalaya State Planning Board.

“Ka sorkar MDA u neh ko ym du san snem tangwa waroh chi rta” da ong u Renikton Lyngdoh, u MLA ka HSPDP.

“U Conrad toh uwa yahkhmat uwa dang biang bha i rta, uwa khlan wei uwa yoo jgnai yeiwa emkaam ka jylla waroh kawi,” da ong u Renikton.

U montri ka tnat Urban Affairs, u Hamletson Dohling da ong u, “Kani ka election man ko kawa kyrpang ym du neidaw wa u Clement G. Momin man u u kyrtong ka NPP tangwa u yong ka sorkar MDA wei kyntu i ya waroh wow wow jied ya oo khnang wa ka Ampati leh u em ko na i liang ka sorkar MDA.”

Da ong chooh chooh u wa ka PDF la man katwa man ym kyrchaan ko ya ka Congress.

Neiliang u Conrad K. Sangma da ong u wa ka MP ka Congress, ka Susmita Deb kawa da wan ha Joyfur da ong ko wa u Mukul Sangma daw man biang u kam u montri rangbah, da phylla u wow sñiaw yeini neibhah ymyoh MLA ki wow chna sorkar.

Chooh chooh da ong u wa waroh ki MLA samen kyrchaan wei emlang ki wa ka sorkar jylla kawa katni.

Da kyntu u ya ki paidbah ka Ampati wow kyrchaan ya u kyrtong ka MDA deiwa ong, “Lada u Clement G. Momin chah jied u, daw pait i yeiwa emkaam phi hapoh ka Constituency yow wanrah ya ki kaam pynroi ha waroh ka jylla kamjooh”.