Jowai : Ynne i sngi heipor kamwa 2-3 waje i sngi da em wa thang yei jhep wa lang ha Ïawmusiang nadooh ka 5 tarik ha laad Wahnangbah.
Hadien wa sdang ini i diñ u kyrooh da sdang i tdem leh u tymmoh ya ka sarok heipor wa wai skur ki khynnah.
Heijooh i por leh ka lyær da sdang ko u joor wei katdang kyrooh i diñ kattæ nang jor i tdem. Kamtæ hadien kattu katni por da wan da ka kawi ka trok tympleh diñ kawa da tympleh yeini i diñ.
Hei yaklam wa u ma S.C. Laloo u CEO ka Jowai Municipal Board (JMB) da ong u wa neidaw wa ym em ye u su tulop nadooh u Naikhynde ( September) ynnin snem ya waroh ki wakreh kmatæ kiwa kreh kam ki sweeper da rai ki u dam kreh chipor chwa khlem booh por.
Ong chooh chooh u wa ka tulop yong kiwa kreh waroh ka JMB da jan poi ko T. 9 Lak chibnai.
I khrong bai kit jhep toh du T. 30 chi yung chibnai na ki 5097 ki yung ha Jowai kiwa kynthup ya ki 24 tylli ki dong. I mih neini i khrong man i du T 1.52 Lak donhi chibnai. Ong u leh wa neidaw wa ym em yoh tulop kiwa kreh em leh kiwa da chah beh ki na ki yung wai wa chong ki.
Ong u leh wa boon ki dong ym em ye ki u su tista ya ka bai kit jhep cha ka Municipal. Heijooh ipor leh ong u wa da pynku ya ka bai kit jhep nadooh uni u bnai cha ka T. 50 yow pynku ya ka yarong poisa ka JMB.
Ka JMB nachwa jooh ye ko u kreh deiwa yoh ya ki grant na ka sorkar jylla wa ka sorkar pyrdi tangwa katni da yooluti wa ka JMB da ye ko u im deibor yongka hi. Neibhah ha kani ka 13th wa ka 14th Finance Commission leh ym em yoh bhah ka JMB.
U ma Laloo ong u leh wa da dep thoh u wei da dep yachem u leh ya ki heh wa toh u pait yeini i kaam wei yoluti u wa daw ye u pynbait yeini waroh ha kini ki sngi wa daw wan.
Discussion about this post